Shillong, Ïaïong 04
Ar tylli ki kynhun seng jong ka NEHU ba kynthup ïa ka NEHUTA bad NEHUNSA ha ka Sngi Thohdieng ki la dawa ïa ki 2 ngut ki nonghikai ka skulbah ba kin ieh noh mardor ïa ka kam kaba ki bat mynta kum ki Pro Vice-Chancellor.
Ki ar seng ki la pynpaw ka jingsngewkhia kaba jur halor ka jinglong-jingman kaba mynta ha kaba ym don Vice-Chancellor (VC) hapoh skulbah ban khmih ïa ki kam ki jam naduh ka 6 tarik u Lber, 2025 bad ki jingjia kiba dang shen ha NEHU.
“Ki ar seng ki kwah ban pynpaw biang ba ka jingshah thung Pro-VC jong phi katkum ki jingpynbna ba la pynmih da u Assistant Registrar, Planning, ha ka 13/11/2024 bad u Omkar Singh, ha ka 14/11/2024, kam long kaba lah ban pdiang naba ka jingïa-lang ‘Executive Council’, ha kaba la ïakren ïa ka rai ban thung ïa ki Pro-VC, kam don ïa ka jingdon briew kaba duna eh ha ka jingïalang ha shuwa ban shim rai,” ong ki nongïalam jong ar seng ha ka shithi ba la phah sha 2 ngut ki Pro-VC – Prof. S.M. Sungoh bad Prof. Fameline K. Marak.
Ki la ong ruh ba u VC (Prof. P.S. Shukla), u bym shym la don ha HQ ka NEHU, Shillong, um shym la bud ryntih ïa ki rukom treikam kiba dei katkum ka ‘Statute’ 3 jong ka NEHU.
“Ka shithi kaba la pynmih da u Omkar Singh, uba don hapdeng ka shuti naduh ka 3/11/2024 bad u bym pat wan sha HQ jong ka NEHU, Shillong haduh kine ki sngi, kane hi ka long ka bym ïahap. Nalor kata, ka jingleh jong u Prof. Shukla bad u Omkar Singh haba ki don hapdeng ka shuti bad ka jingbym don ha HQ ha NEHU-Shillong, ki la shah pynlong bym treikam shuh da u Vice Chancellor (Acting) ha ka 23/11/2024,” ong ki nongïalam jong 2 seng.
Ha kajuh ka por, ki pynrem jur ïa ka jingthung bad ka jingpynïasoh jong kine 2 ngut kum ki Pro-VC bad ong ba ka dei ka jingleh be-aiñ jong u Prof. Shukla.
Kum ban shu kdew, kine ki 2 seng ki la kyntait war ïa kane ka jingthung Pro-VC naduh u bnai Naiwieng, 2024 bad naduh katei ka por ym shym la don jingkylla eiei bad ki dang kyntait beit ïa kane haduh mynta.
Halor ka ‘Earned Leave’ u Prof. Shukla katkum ka jingai jingmut jong u Director Higher Education, ka Sorkar India naduh ka 15 tarik u Naiwieng, 2024 kaba u la pynjlan haduh ka 2 tarik u Lber, 2025 (bad haduh kine ki sngi um pat pynïasoh sha Headquarter ha NEHU Campus Shillong), ki nongïalam ki la ong, “Kane ka ïalam sha ka jingïai bteng jong ka jingpep na ka kam ha Headquarter ka NEHU, Shillong na bynta 140 sngi lynter haduh mynta. Ïa ka kaiphod ‘Inquiry Committee’ halor ka jingleh jong u Prof. Shukla ym shym la pynpaw paidbah da ka tnad pule-puthi, ka Sorkar India bad kumta ym lah ban ong ba u donkti halor ki jingkynnoh pyrshah ïa u.”
“Kaba kham sngewkhia shuh-shuh ka long ba katba baroh ki nongïashim bynta ki la pyrshah ïa ka jingbteng u Prof. Shukla ïa ka kam VC, kumjuh ki MP Lok Sabha ka Jylla – Dr. Ricky A. J. Syngkon (Shillong konstitwensi) bad u Saleng A. Sangma (Tura konstitwensi) kiba la rah ïa ka mat ban weng noh ïa u VC wat ha Parliament ha ka dorbar kaba dang ïaid, phi pat phi kyrshan ïa u Prof. Shukla bad pynlong aiñ ïa ki kam be-aiñ jong u, ki jingpynkheiñ ïa ka NEHU Act & Statutes, ki kyndon ka Sorkar India bad ka jinglong pyrshah ‘riewlum bad pyrshah Meghalaya jong u kaba u la paw shai ha ka samoi treikam jong u,” ki la ong.
Na ka liang ki 2 seng ki la kren shai ba kim ithuh ïa kiba kum kine ki jingthung be-aiñ ïa ki Pro-VC ha Shillong bad Tura Campus kiba la leh da kaba pynkheiñ ïa ki kyndon jong ka NEHU Act & Statutes; bad ki kyndon ka Sorkar India bad rukom treikam.
Shuh shuh ki la bynrap, “Ka long ruh kaba donkam ban pyntip sha ka Prof. Sungoh ba ki don ki kyndon ba la pynmih da ka tnad pule-puthi ka Sorkar Pdeng na ka por sha ka por, kiba don bad ka skulbah, ki bym shah ïa u briew ban bat ïa ka ‘Statutory Post’ na bynta 3 bnai shuwa ban shongthait bad phi shongthait ha ka 31 tarik u Jymmang, 2025. Ki juh ki kyndon la pyndonkam da u Acting VC dang shen ha u Kyllalyngkot, 2025 na bynta kaba kum kane kajuh ka kam.”
