Shillong, Ïaïong 04
U Nongaiktien ka Sorkar MDA-II uba dei ruh u Myntri hapoh ka Sorkar, Bah Paul Lyngdoh u la ong ba ka All Party Committee (APC) kaba bishar ïa ka kam ban pynïasoh lynti rel hapoh ka Jylla Meghalaya, kam mut satia ban ïakren tang bad ki briew jong ki seng saiñpyrthei, hynrei kan kynthup ruh ïa kiba pyrshah, kiba kyrshan bad kiba long pdeng ha kaba ïadei bad ka lynti rel”, la ong u Bah Paul haba kren bad ki lad pathai khubor ha ka Sngi Thohdieng.
U la ong ba ka jingïalang jong ka komiti kan sa long noh kloi kumno-kumno mynta u bnai bad ka Sorkar kan khot lut ïa baroh kiba don bynta namar ka kwah ban sngap ïa baroh ki jingpynsngew, la ka long na ki Nongmihkhmat paidbah, ki sengbhalang, seng treimon sngewbha bad ki dorbar shnong.
“Hadien ba la sngap lut ïa baroh ha kaba kut ka Sorkar kan sa shim ïa ka rai ba khatduh”, u la ong.
U Bah Paul u la ong ba ka jingmut jong ka komiti baroh kawei hangne ka long ban ai lad lane ban plie lad ban ai ïa ka rynsan ban pynpaw ïa ki jingmut bapher-bapher bad lada don kiba ïapher ruh halor kane ka mat jong ka lynti rel.
Haba kylli, u Bah Paul u la ong ba ïa kaba mynta ha kane ka komiti yn ym pat kynthup ïa ka Northeast Frontier Railway (NFR) namar ka Sorkar ka kwah ban ïamir jingmut shwa tang bad ki kynhun na ka Jylla Meghalaya, hynrei hadien ba la pyndep lut ïa ki kam, ka Sorkar kan sa khot ruh ïa ki shnat treikam ka Sorkar Pdeng.
Ka Sorkar Jylla ha ka Sngi Palei ka la pynbna ba la thaw ïa ka All Party Committee, kaba kynthup ïa ki seng kiba la ithuh bad ki seng kiba la dep ban register ban ïakren halor ka phang ban pynïasoh da ka lynti rel sha Meghalaya.
Ïa kane ka komiti yn khlieh da u Myntri Rangbah ka Jylla lane da kino-kino ki Myntri kiba u Myntri Rangbah u bynshet kam.
Ha kane ka jingpynbna ka Sorkar la bthah ba ki seng saiñpyrthei kin phah 2 ngut ban long kum dkhot ha ka komiti, bad ki tnat Sorkar ba don jingïadei bad kane ka kam ruh kin shah khot sha ka jingïalang ban pynlong da ka komiti.
Ki kam jong ka komiti ki long ban shong bishar bad wad ïa ki lad ki lynti ban pynbeit na ka bynta ban pynïasoh lynti rel ha Meghalaya.
