Nongstoiñ, Ïaïong 04
Ha ka miet jong ka 2 tarik mynta u bnai, la ong ba uwei u samla Khasi ba la tip kyrteng kum Aiborlang Mawlieh na ka shnong Mawduh, West Khasi Hills uba leit bylla sha ka thaiñ Langpih u la shah shoh bad shah pynshitom ha ki Pulit ka Assam.
Ïa kane la pyntikna ruh da ka Hynñiewtrep Youths’ Council (HYC) Ri-Muliang Circle, ha kaba kane ka seng ha ka Sngi Thohdieng ka la leit ban ïakynduh bad aiti ruh ïa ka jingthoh ha u Deputy Commissioner ka West Khasi Hills ban kyntu ba un shim khia halor kane.
Haba kren sha ki lad pathai khubor halor kane ka jingjia hadien ka jingleit ïakynduh ïa u DC, u samla Distarbor Wanñ-iang, President ka HYC Ri-Muliang u la ong ba ka jingleit ban ïakynduh jong ki ïa u DC ka dei halor ar tylli ki mat; katta ka long halor ka jingshah kem bad ka jingshah pynngat kyndon ïa ki briew ha ka 26/10/2023 na ka shnong Nongdron Para, bad sa kawei pat ka dei halor ka jingshah kem bad shah shoh pynmynsaw u samla Aiborlang Mawlieh ha ka 2 tarik mynta u bnai kaba la jia ha Langpih, Mokoibari.
U samla Distarbor Wanñiang, President ka HYC haba batai halor katei ka jingshah shoh jong utei u samla kaba la jia ha katei ka miet u la ong ba katei ka jingshah kem bad katkum ka jinglum jingtip bad katkum ka jingïoh ban ïakren bad utei u samla, ka long hadien ba la mih ka jingshah pynjot jong ka kali jong utei u samla Khasi kaba dang pynïeng ha kawei na ki jaka ha Langpih Makoibari ha uwei u Nepali, la wan poi ki pulit jong ka Meghalaya, Langpih AD Camp ha kaba ki la pyntip ruh sha u I/C Jong ka Assam Langpih A/D Camp bad hadien katto-katne, la ong ba hapdeng ka jingbuaid kyiad la wan poi u I/C jong ka Assam Langpih AD Camp bad u kem kylla ïa utei u samla Khasi bad u la thep hapoh ka kali ha kaba ki la shoh ban kynjat haduh ba un da mynsaw na ki dkhot met.
Shuh shuh la ïathuh ruh ba hadien ka jingleit ïakren jong ki pulit ka Meghalaya kiba don ha Langpih, ïa utei u samla la pyllait noh.
U samla Distarbor u la ong ruh ba katkum ka jingpeit ïa ka ‘Medical Report’, ka long ba la lap ba utei u samla u la mynsaw shisha. Kumta ha ka jingleit ïakynduh ïa u DC, na ka liang u DC u la ong ba un shim khia ïa katei ka bynta ban ïakren bad ki bor distrik jong ka Assam.
Haba ïakren pat bad u SP ka West Khasi Hills u la ong ba ym shym la lah ban pyntikna hynrei ka jingtohkit halor katei ka jingjia ka dang ïaid shakhmat.
