Shillong, Ïaïong 04
Ka Hynñewtrep Youths’ Council ka la kren shai bad phah ïa ka khubor kaba tyngeh sha ki shnat jong ki shlem treikam ka Sorkar Pdeng ba kim dei ban shu wan leh mon sha kane ka Jylla, hynrei ki samla ka Jylla ki dei ban ïoh ïa ka lad ban pule bad ban trei ban ktah ha kita ki shlem Sorkar.
“Ngi wan sha kane ka jaka ban pyni ba ngi long trai halor ka khyndew ka shyiap, ngi long trai ha la ka ri bad ki briew ba nabar kim lah ban wan leh mon ha kane ka ri jong ngi”, la ong u President ka HYC, Bah Roykupar Synrem hadien ba leit tur ha kamra treikam u Director ka NEIGRIHMS namar ka jingmynthi ban jubab ïa ki jingdawa ka seng ha kaba ïadei bad ka rukom thung kam.
Shwa ïa kane, na ka liang ki dkhot bad nongïalam ka HYC ki la leit tur puk sha kamra treikam u Director ban phah mih ïa u shabar hadien ba la kut ka jingai por ba hynñiew sngi halor ki jingdawa ban pynkylla ha ki kyndon thung kam thymmai.
Hapdeng kane ka jingleit tur jong ka seng ka la don ka jingïapyni bor bad ki nongap pahara ha NEIGRIHMS kiba la khanglad ïa ki dkhot ban leit tur sha u Director, Prof. Nalin Mehta, bad ha shwa kane ki dkhot ka HYC ki la phah mih lut ruh ïa baroh ki nongtrei ka Administrative Block.
Hadien ba la ïakren na ka liang u Prof. Mehta u la kohnguh ban mih shabar ban ïakren bad u President ka HYC, bad hadien katto-katne por u la khot ïakren noh ïa ki shapoh.
Katkum ka jingïathuh u Bah Synrem, na ka liang ki bor pynïaid ka NEIGRIHMS ki la kohnguh ïa katto-katne ki mat ba la dawa ka seng, ba kynthup ïa ka jaka pynlong eksam thung kam ba ki samla na kane ka Jylla kin ïoh ban ïakhun ïa ka eksam ha ka jylla lajong, ha kaba u la ïathuh ruh ba la aiti ha ka HLL Lifecare Limited ban pynïaid ïa ka eksam namar ba ka seng kam shaniah ïa ka Nursing Officer Recruitment Common Eligibility Test (NORCET).
U la ong ba kawei na ki mat ka dei ka jingthung kam kham bun da ki kynthei kaba long 80-20 percent ïa ki shynrang.
U Bah Synrem u la ong ba haduh mynta ka NEIGRIHMS kam don ïa ka Recruitment Rules (RR) halor ka bhah mang kyrpang na ka bynta ki nos kynthei bad shynrang bad namar kata ka hospital ka donkam ban ïoh jingmynjur shwa na ka tnat Ministry of Health ka Sorkar Pdeng.
“Na ka liang ka NEIGRIHMS ka la pyntip ba kan phah jingthoh sa shisien sha ka Ministry namar haduh mynta ka jubab ba ka Ministry ka ai kam shai satia ba ka lah ban leh 80-20 percent”, u la ong ha kaba u la bynrap ba lada ka Ministry ne ka NEIGRIHMS kam pyntreikam ïa ka 80-20 percent, na ka liang ka seng kan ym ailad ban ïaid shakhmat ha ka jingthung kam thymmai.
“Ngin sa wad ruh da kiwei ki lad ban pynthikna ba kane ka 80-20 percent kan treikam hapoh NEIGRIHMS”, la ong u Bah Synrem.
