Shillong, Ïaïong 04
Ki dkhot ka Khasi Students’ Union na kylleng ka bri u hynñiewtrep ki la poi palat hajar ngut kiba la hiar da ki spah tylli kali naduh ki bos, ki sumo ban leit sha Khliehriat kaba hap ha East Jaiñtia Hills District ban rakhe ïa ka sngi Kyrsiew Ri ne ka Khasi National Awakening Day ha ka 4 tarik Ïaïong 2025.
Haba U Nongsaiñ Hima ryngkat ki paralok nongthoh khubor na Shillong ki la hiar sha Khliehriat la shem ba ki trok ki duna ki ban ïaid naduh Mawryngkneng shaduh Khliehriat namar la pynsangeh noh haba ïaid lynti ki dkhot ka KSU. Shuh shuh la ïohi ba ki kali ba shong ki dkhot ka KSU naduh ki bos bad kali rit ki la sdang bun mar shu poi ha Phramer kaba dei ka lad ban leit sha Shangpung namar baroh ki kali ki la ap lang ha kane ka jaka.
Haba la poi sha Ladrymbai ter ter shaduh Khliehriat la ïohi ba ki dukan ki la khang lut naduh dangstep khnang ban ym mih kano-kano ka huri-hura haba ki dkhot ka KSU kin ïaid da ka kjat.
Ha kane ka jingrakhe ka KSU ka la pynlong ka jingïakynduhlang baroh ha madan phutbol Dkhiah West ha ka por 1:00 baje mynsngi ban ïaid kjat shaduh u mot ba shi rynïeng jong u Woh Kiang Nangbah hajan ka ophis Deputy Commissioner East Jaiñtia Hills District hapoh ka jingïalam u Bah Lambokstarwell Marngar uba dei u President, Bah Donald Thabah kum General Secretary ka KSU Sengkmie, ki nongkitkam ka KSU na kylleng ki district bud sa ki samla kynthei bad shynrang kiba la rah ïa ki jingthoh bad ki riam tynrai ryngkat ki tynghung ban pynsawa jingtem.
Katba ki nongïalam ki dang ïaid kjat kham shakhmat, ki pulit ka Khliehriat kiba dang ïeng ha phyllaw ka Thanat Khliehriat ki la shah kawang maw ha ki ‘riew paidbah kiba ïaid nadien kiba poi palat hajar ngut kaba la jia ha ka por 1:45 nohphai sngi hynrei ym shym la ithuh shuh namar la bun palat kiba ïaid kjat. La ïohi ba ki pulit ki la don kiba la mareh bad don kiba ïeng beit hajuh haba shah kawang maw, hynrei na ka liang ki nongïalam ki la wan tehlakam noh.
Hadien ba la kut ka jingïalang ki nongïalam ka KSU ki la leit buh syntiew hakhmat u mot Woh Kiang Nangbah.
Hadien ba la kut ka jingïalang ki dkhot ka KSU ki la wanphai biang sha madan phutbol Dkhiah West da ka jingïaid kjat khlem kano-kano ka huri-hura hynrei la ïohi ba ki pulit jong ka Thanat Khliehriat kim don shuh ban ïeng ha phyllaw hynrei ki la ïeng hajrong ophis bad ïa ki kali ba pynïeng ha phyllaw ruh la pynkynriah lut.
