Shillong, Ïaïong 04
Ka Meghalaya Board of School Education (MBoSE) ka la pynbna ba ka jingpynmih ïa ka risol matrik (Klas 10) ne SSLC 2025, kan long mynta ka Sngi Saitjaiñ naduh ka por 11 baje mynstep.
Ha ka kyrwoh, u Director Accreditation & Controller of Examinations, Bah TR Laloo, u la pynbna ba ïa ka risol lah ban peit na MBoSE Official website www.mbose.in. Kane ka dei ka sien ba nyngkong ba ka MBoSE kan pynbna ïa ka risol ha u bnai Ïaïong namar ba ha ki snem ba la leit, la ju pynbna ha u bnai Jylliew.
Lah ban pynpaw hangne ba ka jingpynbna kloi ïa ka risol jong ka eksamin Klas 10 ka long hadien ba ka Sorkar Jylla ka la wanrah ka jingpynbeit thymmai ïa ka Meghalaya Board of School Education (Regulations for the Secondary School Leaving Certificate Examination), 2011, bad lyngba kane ka jingpynbeit thymmai, ka la rai ban pynlong noh ar sien ha ka shisnem ïa ka eksam matrik naduh mynta u snem.
Hadien kane ka jingpynbeit thymmai jong ka Sorkar, ïa ka eksam matrik lane Klas 10 (ten) yn pynlong ar sien; kawei ka dei kaba ju long ha u bnai Rymphang-Lber yn pynlong noh ha u Nohprah bad kawei pat na ka bynta kito kiba pheil ban ïakhun biang, ïa kaba la buh ban pynlong ha u bnai Jymmang.
Kane ka sienjam jong ka Sorkar ka long ruh ban kham pynkloi ha kaba ïadei bad kito kiba pass ba kin ïoh admishon ban leit pule ha ki skul bad kolej bapher-bapher.
Namar kane ka jingpynbeit thymmai, mynta u snem ka eksam matrik ka don lai sien, kawei kaba la dep ha u Lber bad ka ban mih risol mynta ka sngi nangta yn bud pat sa ka eksam na ka bynta kito kiba pheil ba kin ïakhun biang ha u Jymmang, bad ka eksam ka ban long barabor kan dei ha u Nohprah. Katba ha ki snem ki ban wan naduh 2026 ka eksam matrik kan don ar sien kaba dei ha u Nohprah bad na ka bynta kito kiba pheil yn pynlong biang pat ha u bnai Rymphang lane Lber jong u snem ba bud.
