Shillong, Ïaïong 04
U President ka Khasi Students’ Union Seng-kmie, Bah Lambokstarwell Marngar u la ong ka seng kan wan biang ar shah sha Khliehriat lada don kiba kwah lynti rel.
Ïa kane u la pynpaw haba u ai jingkren ha ka sngi Kyrsiew Ri ba la pynlong da ka KSU hakhmat u mot woh Kiang Nangbah kaba don ha phyllaw ka ophis Deputy Commissioner East Jaiñtia Hills district kaba la long ha ka Sngi Thohdieng.
U la ong u Tirot Sing u la ïap ha ïing byndi ryngkat ka jingshah pynryngkang par bad u woh Kiang Nangbah u shah sdien phasi na bynta ka jaidbynriew.
U la ong ba ha kine ki sngi ki la don kiba sdien phasi bad set byndi ïa la ka jong ka jaidbynriew.
Shuh shuh u la ong ba ki kynhun sengbhalang ki ju khynra ïa ki briew kiba wan na bar jylla bad ki mynder ri hynrei u kham sheptieng ïa ki paradoh kiba dei ki nongdie ri.
Katba u Bah Sadon Blah uba dei President ka HNYF Sengkmie, u la ong ba katba ki sengbhalang ki dang pan ïa ka ILP hynrei ka sorkar ka dang pynthied jaka kylla ïa ki bar jylla ban shna karkhana bad ka dang thmu pynban ban wanrah ïa ka lynti rel.
“Lada ka jylla jong ngi kam don ïa ki aiñ ban ïada ïa ka jingwan kyrthep ki mynder ri sha ka jylla jong ngi ka lynti rel ka dei ka bih bseiñ ka ban puh ïa ka ri bad ka jaidbynriew” u la ong.
U la ong ba ka Sorkar India haduh mynta kaba la ïaid palat khatar snem ka dang pule sah ïa ka rai jong ka ïingdorbar thawaiñ ban dawa ban pyntreikam noh ïa ka ILP kaba don tang khatar sla.
U Vice President ka FKJGP, Bah Kitboklang Nongphlang u la ong ba baroh ki dukan jong ki bar jylla ha Ladrymbai ki la khang khyrdep lut hadien ba ki la ïohi ïa ka jingïatylli ka jaidbynriew.
U la ai khublei ïa ki nongsynshar shnong bad ïa ki samla ki longkmie longkpa kiba ai mynsiem ïa ka KSU bad ïa ki nongïalam ka jaidbynriew ban ïa mih ryntih ha kane ka sngi kyrsiew ri.
U la ong ba kum ki nongïalam bad kum ka jaidbynriew ki la dei ban kylla thiah kylla dem ban im sngi bad durïap ban pynlong ïa ka jingim kaba adkar khnang ba ki nongwei nongar kin ym lah ban peit poh ïa ka jaidbynriew hynrei kin ïohi ïa ka jinglong shi tylli kum ka jaidbynriew.
U la kyntu ruh ïa ki nongmihkhmat ba kin khylliap noh ïa kata ka jingkwah lynti rel, nai kwah khohreh ïa kata ka lynti rel hynrei wanrah shwa ïa ki aiñ ban ïada ïa ka jaidbynriew.
U President ka Khasi Students’ Union East Jaiñtia Hills District, Bah Streamly Suchen u la ïathuh haba u leit sha Assam, ki assamese ki kylli ïa u phi dei u Khasi ne Manipuri? Hynrei kim kylli phi dei u pnar ne bhoi ne maram. Kane ka pyni ba wat ki briew na bar ka jylla ki ithuh beit ïa ka jaidbynriew Khasi.
Kane ka jingpynpaw u Bah Streamly ka dei haba ïakren kyrpang ha madan phutbol Dkhiah West ha shwa ba ki nongïalam bad ki dkhot ka KSU kin sdang ka jingrakhe kyrsiew ri ban ïaid kjat sha Khliehriat.
U Bah Streamly u la ïathuh ba wat ki Khasi kiba sah ha kiwei ki jylla ki kam ba ki dei ki Khasi, dei na kane ka daw ba kane ka sngi kyrsiew ri ha Khliehriat kan pyni ïa ka jingïatylli ki thaiñ bapher bapher kum kawei ka jaidbynriew.
Halor ka jingkren u MLA ka Khliehriat konstitwensi, Bah Kyrmen Shylla ba kiba nabar kim lah ban tuklar halor ka lynti rel, u Bah Streamly u la ong ba ka jingdon ki seng kur ka long shisha kaba teh song namar ki don ki jait na Khasi bad Jaiñtia ki pynlong kawei ka kur hynrei ban kynnoh nongwei ïa ki para jaidbynriew ka seng kur kan ym shah.
U la ong dei ban pyntreikam shwa ïa ka Inner Line Permit sa ïakren ïa ka lynti rel namar kan wan kum ka umsaw ban rong noh ïa ka jaidbynriew.
