Mairang, Ïaïong 04
Ka Deputy Commissioner (Supply) jong ka Eastern West Khasi Hills District, Mairang, ka la pynmih ïa ka jingbthah mynta ka sngi, kaba kdew sha baroh ki nongtrei Sorkar, kynthup ïa ki nonghikai ‘Adhoc’ bad ‘Deficit’ hapoh ka distrik, kiba dang ïoh jingmyntoi na ka NFSA katkum ka ‘Social Economic Caste Census’ (SECC) jong u snem 2011.
Katkum ka kyrwoh khubor ba la phah, la ong ba katei ka jingbthah ka kdew ba la 14 snem mynta naduh ba la pyndep ïa katei ka jingkheiñ jingtip. Bad la lap ba don ki nongtrei Sorkar kiba dang bat ïa ki ‘Rashon Card’ hapoh ka NFSA, kaba long pyrshah ïa ki kyndon ba ki nongtrei Sorkar kim dei ban bat ïa kine.
Shuh shuh ka kyrwoh khubor na ka DC, ka la kyrpad ïa baroh ki nongtrei Sorkar, kynthup ïa ki nonghikai ‘Deficit’ bad ‘Adhoc’, ban aiti noh mardor ïa ki ‘Card Rashon’ jong ki. Ka tarik ba khatduh ban aiti kan long ha lane shuwa ka 30 tarik u Ïaïong, 2025.
La ong ruh ba kane ka jingaiti kan plie lad ïa ki longïing ba duk, ki nongtrei bylla, bad ki briew ba duna dkhot met ban ïoh jingmyntoi.
Kumta lada don kino-kino ki nongtrei Sorkar kiba leh bym suitñiew bad kim aiti ïa ki ‘Card Rashon’ hapoh ka por ba la buh, kin ngat ha ki jingpynshitom katkum ki kyndon jong ka aiñ.
