Shillong, Ïaïong 04
Ka Sorkar India ka la ai por ïa ka Jylla Meghalaya haduh ka 30 tarik Jylliew 2025 ba ki paidbah ba dei ban ïoh ïa u khaw baduk (khaw rashon) lyngba ka National Food Security Act (NFSA) kin pynïasoh AADHAAR.
Namar kane ka jingdonkam kyrkieh, na ka liang ka Sorkar Jylla ha ka Sngi Thohdieng ka la plie bad sdang ban pyntreikam ïa ka Mission Mode Project na ka bynta ban pynïasoh ïa u Aadhaar bad ki Card Rashon jong ki nongïoh myntoi na ka National Food Security Act (NFSA).
Ïa kane ka Mission Mode Project la plie da u Myntri ka tnat Food Civil Supplies & Consumer Affairs ka Sorkar Jylla, Bah Comingone Ymbon, uba la ban jur ïa ka jingdonkam kyrkieh jong kane ka mission namar haduh mynta ki nongïoh khaw rashon kiba la pynïasoh Aadhaar ki long tang 49.61 percent.
U Bah Comingone u la ïathuh ba kumba 10 lak ngut ki briew kiba ïoh jingmyntoi na ka NFSA ki la pynïasoh Aadhaar, katba ki bym pat shym la pynïasoh Aadhaar haduh mynta ki don kumba 11 lak ngut.
“Ka Sorkar India ka la ai por khatduh ïa ngi ha ka 30 tarik Jylliew 2025 ban pyndep 100% ka jingpynïasoh ïa ki Card Rashon bad u Aadhaar. Lada ngim lah, ka Sorkar Pdeng ka lah ban ot ïa ka bhah ïoh khaw. Kane kam dei ka skhim jong ka Jylla, ka dei ka skhim jong ka Sorkar Pdeng kaba thmu ban pynthikna ba ka rukom sam khaw kan long kaba khuid bad suba”, la ong u Bah Comingone haba kren bad ki lad pathai khubor. U Myntri u la ong ba ka jingpynïasoh ïa ki Card bad u Aadhaar kan pynthikna ba ki mar bam kin poi sha kiba dei hok ban ïoh khaw, khamtam ki nongrep, ki nongbylla sngi bad ki longkmie ha ki nongkyndong bad sor jong ka Jylla Meghalaya.
U la kyntu ruh ba ki paidbah kiba dei ban pynïasoh ïa ki Card Rashon bad u Aadhaar ki dei ban leit mih sha ki shlem treikam jong ki Deputy Commissioner, ki ophisar ha Sub-Divisional bad Block Development, ki Nongïalam shnong khnang ban ïoh jingïarap.
