Shillong, Ïaïong 04
U Myntri Rangbah ka Jylla, Conrad K. Sangma ha ka Sngi Thohdieng u la plie paidbah ïa ka Disaster and Relief Monitoring System (DRMS), kaba dei ka ‘digital platform’ ban pynsuk ha ka ban pyntip ïa ki jingjia ba sngewsih namar ka jinglynshop ki bor mariang, ka jingpyntreikam ïa ki jingïarap bad ka jingbei pisa hapoh ka jylla.
Haba kren ha ka jingïalang u Myntri Rangbah u la pynpaw ïa ka jingdonkam jong ka rukom treikam kaba stet, kaba khuid bad ba shai ha ryngkat bad ka jingkitkhlieh na ka bynta ki shnong kiba shah ktah ha ka jingshah pynjulor.
U la ong ba ha ka por ba shem jingeh, man la ki khyllipmat ki long kiba kongsan bad ka DRMS ka dei ban pyntikna ba ka jingïarap kan poi sha kito ki longïing kiba mad ïa ka jingshah ktah bad kane kan dei ka sienjam kaba khraw na ka bynta ka jylla.
Kane ka rukom treikam bathymmai jong ka tnat Revenue & Disaster Management ha ryngkat ka jingïatreilang bad ka NIC Meghalaya, kan long kum ka rynsan ba kongsan ban pynïaid beit shakhmat bad ban pyndep ïa ki kam kiba ïadei bad ki jingïarap hapoh ka State Disaster Response Fund (SDRF) bad ka National Disaster Response Fund (NDRF).
Ki mat ba kongsan hapoh kane ka Disaster and Relief Monitoring System ki kynthup ïa ka jinglah ban peit bniah ïa ki jingjia ba sngewsih ha kylleng bad ha baroh ki District bad ki Block ban pynbha ïa ka rukom treikam.
Shuh shuh ban don ka jingïatrei lang kaba jan hapdeng ka shlem treikam Block Development Officer (BDO), ki bor pynïaid District bad ka tnat Revenue & Disaster Management.
Ka dei ban don ka jingtreikam kaba shai ha kaba ïadei bad ka kam pisa pilaiñ ha ka jingpyntreikam ha ka Public Financial Management System (PFMS) ban pynpoi beit ïa ka pisa sha kiba dei hok ban ïoh bynta.
Hapoh ka DRMS kan kynthup lang ïa baroh ki jingshah pynjulor ha ka mariang, naduh ka jingshlei um, ka jingtwa khyndew, ka lynshop ‘erïong kumjuh na ka jingwan u jumai bad ruh ban pynthikna ïa ka jingpyntreikam ba janai na ki bor pynïaid district bad ruh na baroh ki tnat Sorkar kiba don bynta.
