Nongstoiñ, Ïaïong 04
U Superintendent of Police, West Khasi Hills, u pyntip ba ha ka 23 tarik u Jylliew 2020, la ïohpdiang ïa ka ejahar (FIR) na u nongujor ba ha ka 20 tarik u Jylliew 2020, u Hamidul Ali @ Islam @ Rahul na shnong Daripal u la leh ïa ka kam bymman da kaba rahbor bad leh be-ijot ïa kawei ka khynnah kynthei.
La pynngat mukotduma ïa kane hapoh Shallang P.S Case No. 16(6)2020 U/S 363 IPC R/W Sec 3(a)/4 POCSO Act bad la aiti ïa ka jingtohkit ha WPSI, B. Dkhar na Nongstoiñ Women Police Station ban tohkit bniah.
Ha ka kyrwoh khubor ba la phah u SP u la ong ruh ba hadien ba la pyndep ïa ka jingtohkit, la phah ïa ka mukotduma sha ka Ïingbishar Special Judge (POCSO), Nongstoiñ ban bishar.
Shuh shuh ka kyrwoh khubor ka la pynpaw ba ha ka 27 tarik u Lber 2025, ka Ïingbishar Special Judge (POCSO), Nongstoiñ, hadien ba la bishar bniah ïa baroh ki sakhi satar ba la lum ha ka jingtohkit, ka la rai pynrem ïa u Hamidul Ali @ Islam @ Rahul da kaba un shah set byndi haduh 10 snem bad ka kuna kaba long T.25,000 na ka bynta ka kam thombor ïa ka khynnah kynthei, nangta un shah set byndi 4 snem bad ka kuna kaba long T.10,000 na ka bynta ka kam rahbor bad lada um lah ban siew ïa ka kuna ha ka por ba la buh, un shah set byndi shuh sa hynriew bnai.
