Shillong, Ïaïong 06
Ka jingwanpoi u Sachin Tendulkar, khlur ïalehkai kriket barim ka ri India ha shnong Mawlynnong kaba don harum Pynursla, East Khasi Hills District myn ha ka 5 tarik Ïaïong, 2025 kan rah shuh shuh ïa ka kam jngohkai pyrthei hapoh ka jylla namar ki nongjngohkai pyrthei kiba wankai ha Mawlynnong ha katei ka sngi ki la ïaknieh ban shondur lang.
Haba ïoh ban ïakren bad u Secretary Shnong Mawlynnong, Bah Precius Khongdup, u la ïathuh ba u Sachin Tendulkar ryngkat ka kurim ka Anjali Tendulkar bad ka khun kynthei ka Sara Tendulkar ki la wankai sha Mawlynnong mynha ka sngi Saitjaiñ ha kaba u la pynlut por haduh ar kynta ban shangkai ïa ka shnong bad wan ban dih sha step syndon.
U la ïathuh haba la don kiba pyntip ba kin pynkhreh bam haba wan ki briew kiba la paw ha ka ri India, kiba shong dukan ki la pynkhreh beit hynrei kim poi pyrkhat ba un dei u Sachin.
U la ïathuh biang haba u Sachin Tendulkar u la poi sha Mawlynnong, ki briew napoh ka shnong bad ki nongjngohkai pyrthei kiba wan na kiwei ki jylla ki la ïoh ban shondur lang.
U la pyntip ruh ba hadien ba u la dep bam u la leit noh namar un sah sha Shillong.
Shuh shuh u la pyntip ba ki khlur ïalehkai kriket kiba la paw ha ri India kiba la wankai sha Mawlynnong ki long u Rahul Dravid, Shikhar Dhawan bad mynta u Sachin Tendulkar.
U Bah Khongdup u la pyntip ba ka jingwan ki briew kiba paw bad ki nongjngohkai pyrthei ha Mawlynnong, namar ki bna ïa ka jingkhuid jong ka shnong, kumta ka shnong ruh haduh mynta ka dang pynneh pynsah beit ïa ka jingkhuid.
U la pynpaw ba da ka jingwan ka kam jngohkai pyrthei ka la aikam shisha ïa ki briew hapoh shnong namar ïa ki dukan la pynïaid hi ki trai shnong bad lada duna nongtrei la khot ïa ki briew kiba nabar shnong.
U la pyntip ruh ba wat la ka kam jngohkai pyrthei ka la ai kam hynrei ïa ka rep ka riang ki briew ha ka shnong Mawlynnong ki dang bteng beit.
Kum ban shu pynkynmaw u Sachin Tendulkar u la wan poi sha Guwahati ha ka 3 tarik mynta u bnai ban wan sah ha Shillong bad leit kai sha Sohra bad Mawlynnong bad mynta u la leit phai noh sha Guwahati.
