Shillong, Ïaïong 06
U Myntri ka Sorkar Jylla, Bah Paul Lyngdoh u la ong ba ka jingmynjur ka Parliament ïa ka Immigration and Foreigners Bill, 2025 ka dei ka sienjam kaba khraw bad kan ai jingïada bad ïarap bad shibun ïa ka Jylla Meghalaya.
Haba kren bad ki lad pathai khubor u la ong ba kane ka aiñ kan ïarap ïa ka Jylla Meghalaya kaba don ïa ka khappud ba jrong bad ka ri Bangladesh.
Nalor ka Bangladesh u Bah Paul u la ong, “Ngi don marjan ruh bad ka Assam, kaba ju bna bha ba ka ïakynduh jingeh na ka jingwan rung be-aiñ ki briew nabar ri. Kane ka aiñ kan wanrah ka jingkylla, ha ka jingshisha kan pynkhlaiñ ba ngin the ngin khum ïa kiba rung be-aiñ ha ka thaiñ Shatei Lam Mihngi”.
U la ong ruh ba lada shim ïa kaei kaba jia mynta ha Bangladesh ka long kaba donkam ban shim ïa ki sienjam ban pynthikna ba kan ym don jingshah ktah ha ka jingdon ki paidbah nongshong shnong ka Jylla.
“Lada shim ïa ka jinglong ka saiñpyrthei jong ka Bangladesh kaba lah ban kylla ha kano-kano ka por, ngi donkam shisha ki sienjam kiba biang ban ym shah ktah ha ka jingbun paid ha kiba thmu rung be-aiñ”, la ong u Bah Paul.
Haba pynpaw ka jingkyrshan ïa kane ka Bill ba la wanrah da ka Sorkar Pdeng, u Myntri u la ai khubei ïa ka Sorkar kaba la shim khia halor kane ka jingma kaba ap.
Lah ban pynpaw ba ka ïingdorbar Parliament ka la mynjur ïa ka aiñ rew ka ban the kyndon ïa ka jingwan rung bad jingsah jong ki briew na kiwei ki ri hapoh India. Ïa kane ka aiñ rew, Immigration and Foreigners Bill, 2025 la mynjur da ka Lok Sabha ha ka 27 tarik Lber 2025, bad ka la ïoh ruh ïa ka jingmynjur ha Rajya Sabha lynba ka jingrah sur ‘voice vote’ ha ka 2 tarik mynta u Ïaïong.
