Shillong, Ïaïong 06
U Myntri ka tnat pule-puthi jong Sorkar Jylla, Rakkam A Sangma u la ai khublei kyrpang ïa baroh ki khynnah skul kiba don ha kylleng ka Jylla kiba la pas bha ïa ka eksamin Secondary Sch-ool Leaving Certificate (SSLC) ha ka risol ba la pynbna da ka Meghalaya Board of School Educa-tion (MBoSE) ha ka 5 tarik u Ïaïong, 2025.
Haba kren sha ki lad pathai khubor hadien ba la dep ban pynbna ïa ka risol da ka MBoSE, u Myntri u la ai mynsiem ïa kito ki samla pule ki bym shym la poi sha ka thong ha ka jingpyrshang jong ki bad u la kyntu ruh ba kim dei ban duh mynsiem hynrei ban trei shitom shuh-shuh ha ka jingpynkhreh ïa ka Supplementary Exam kaba la khmih lynti ban pynlong biang ha u bnai Jymmang 2025 na ka bynta kito ki khynnah kiba phiel bad kiba shah bat ha ar ne lai tylli ki sobjek.
“Na ka bynta kito ki khynnah kiba phiel, ha ka jaka ba kin duh mynsiem hynrei ki dei ban sngewkmen ba ka dang don sa kawei ka lad ba kin ïakhun ïa ki sobjek ba ki phiel bad ïa kane ka eksam, yn sa pynlong ha u taïew ba khatduh jong u Ïaïong ne ha ki taïew ba nyngkong jong u bnai Jymmang bad kine ki khynnah ki dei ban leh bha”, ong u Myntri.
U Rakkam u la ong ba kane ka jingdon ka jingpas bun jong ki khynnah ha kane ka kynti kaba mynta ka dei u soh ka jingjop kaba ki nongïalam bad kiba don bynta ki la trei shitom met bad mynsiem naduh ki nonghikai, ki nongtrei bad baroh kiba la don bynta ha ka ban noh synñiang ban pynïaid beit-pynïaid ryntih ïa kane ka eksamin.
“Hooid, ka dei shisha ka ban sah jingkynmaw bad ka rekord kaba la thaw ïa ka jingpas bun ki khynnah bad ïa kane la lah ban pynurlong lyngba ka jingtrei shitom kaba napoh jong ki tnat treikam ka Sorkar Jylla”, ong u Myntri.
Shuh-shuh, u Myntri u la ong ba ki khynnah pule ki la sngewthuh kham bha ïa ka jingkordor ka pule-puthi, kumta ka la pynlong ïa ki ba kin trei shitom ban poi sha ka thong.
