Shillong, Nailur 20
Ki ar ngut ki MLA kata u Bah Nujorki Sungoh uba mihkhmat na Mowkaiaw constituency bad u Bah Comingone Ymbon uba mihkhmat na Raliang constituency kaba hap ha West Jaiñtia Hills District ki la dawa ïa ka civil sub-division tangba ïa ka ophis treikam ki ïaknieh ban buh ha constituency lajong.
Kane ka jingdawa civil sub-division ïa ka Laskein Block ka dei hadien ba u Bah Nujorki Sungoh, u MLA ka UDP ba mynta na Mowkaiaw u lah ban rung noh sha ka NPP lada ka Sorkar ba la ïalam da ka NPP kan kyntiew kyrdan ïa ka Laskein Block sha ka Civil sub-division.
Katba u Bah Comingone Ymbon uba dei u MLA ka Raliang constituency ryngkat ki nongkitkam shnong ki la dawa ïa ka Civil sub-division ban buh ïa ka ophis sha Shangpung.
Kane ka jingdawa civil sub-division baroh ar ngut ki MLA kiba donlang ha ka Sorkar kan sa pynklumar ïa ka Sorkar namar ki la ïa tan ban buh ïa ka ophis sha constituency lajong.
Haduh mynta ki nongkitkam u Bah Nujorki ki don jingkyrmen ban kyntiew kyrdan ïa ka Laskein Block sha ka civil sub-division kaba kynthuplang ïa ka Raliang constituency namar ka Laskein Block ka dei kaba slem kaba pynsuk ïa ki shnong kiba sah ha khappud bad ka Assam.
Ki nongkitkam jong u Bah Nujorki ki bym kwah ban pynpaw kyrteng ki la ong ba lada buh ïa ka ophis jong ka Civil sub-division sha Shangpung kam don jingmut namar ka la suk ïa ki ban leit sha Jowai hynrei ki ong ba kumno yn buh ophis sha Shangpung haba tang ka block kim pat ïoh.
Ki don jingkyrmen ba u Bah Nujorki Sungoh un rung beit sha ka NPP lada ki lah ban pynkiew kyrdan sha ka Civil sub-division.
Ka jingïatan tyllai kine ki ar ngut ki MLA ka lah ban pynsahteng ïa ka Sorkar ban kyntiew kyrdan ïa ka Laskein Block sha ka Civil sub-division hynrei ka shong beit ha ka sorkar ha kano ka jaka ban buh ïa ka ophis treikam.
Kane ka jingthmu u Bah Nujorki ban rung sha ka NPP namar ki 8 ngut ki MLA ka UDP kin rung sha ka BJP katba ar ngut kiwei pat ki MLA kin rung noh sha ka NPP.
