Nongstoiñ, Nailur 20
U MLA ka Nongstoiñ Bah Gabriel Wahlang ha ka sngi Palei u la ïoh ban pynkup burom ïa ki 219 ngut ki samla ka thaiñ kum ka dak jong ka jingnang ai mynsiem ïa ki, lyngba ka jinglah ka jong ki ban poi sha ka thong ha ki bynta bapher-bapher ha ka jingim ka jong ki.
Kane ka dei ka 4th MLA Excellence Award 2026 ïa kaba u MLA ka Nongstoiñ u la ïoh ban pynkup burom, bad lehse kane kan long ym tang ka jingnang ai mynsiem ïa ki samla ka thaiñ hynrei kan long ruh ka jingnang pynshlur ïa ki ba kin trei shitom bad buh ïa ka thong ka jong ki shakhmat ban ïakhun tyngeh ban ïoh ïa u soh ka jingjop ha ka jingim ka jong ki la ka long ha ka pule ka dangle, ha ki sap ki phong bad kiwei kiwei.
Ïa kane kane rynsan la pynlong hapoh ka Dorbar Hall ka Shnong New Nongstoiñ ïa kaba la pynlong ruh da ka 4th MLA Award Committee ha ka jingïatreilang bad ka Banarig Foundation.
Ha kane ka sngi, u Bah Gabriel Wahlang uba long ruh kum u Adviser ka Sorkar Jylla u la long u kongsan ha ka jingdonlang ka Hema Nayak, IAS, Deputy Commissioner ka WKH kum ka symbud kongsan, Bah Herbert Pyniaid Kharkongor, MPS, Superintendent of Police ka West Khasi Hills District, ki Principal jong ki skul bapher-bapher, ki nonghikai, ki ophisar na ki tnad Sorkar bapher-bapher lem ki khynnah skul bad kiwei-kiwei.
Ki 219 ngut kiba la ïoh ïa ka jingpynkup burom lyngba ka 4th MLA Excellence Award 2026 ki kynthup ïa ki 76 ngut kiba la wan shakhmat bad kiba la ïa shimbynta ha ka marathon, essay, painting bad drawing.
Nangta, ha ka liang ka Academic ki don 73 ngut kiba kynthup ïa ki PhD, MPSC, post graduate, graduate, HSSLC bad SSLC.
Shuh shuh 70 ngut pat ki long ki samla ïalehkai ha ki jait jingïalehkai bapher-bapher, kynthup ïa kiba la ïa shimbynta ha ka National bad State level.
U kongsan haba ai jingkren u la ong, naduh ba u la jop ïa ka ilekshon kum u MLA kawei na ki thong jong u, ka long ban kyntiew ïa ka pule puthi jong ki khynnah skul.
U la pynpaw ka jingkyrmen ban ïohi ba na Nongstoiñ kin mih ki ophisar Sorkar kiba kynthup ïa ki ophisar IAS bad IPS.
Shuh shuh u la pynpaw ruh ka jingkmen halor ka jingdon bun jong ki samla kiba la shah pynkup burom mynta u snem namar ka jinglah jong ki ha ki eksamin bapher-bapher.
U la ong ruh ba ki jingjop jong ki, ki la wanrah ïa ka nam nyngkong ïalade, bud sa ki kmie ki kpa, ïa ki nonghikai, ka dong ka thaiñ bad ka District hi baroh kawei.
U Bah Gabriel u la pynshlur ruh ïa ki nongïoh khusnam ba kim dei ban kheiñ ïa ki jingjop jong ki kum ka jingkut jong ka jingïaid lynti jong ki, da kaba ban jur ba ka dang don ka lynti kaba jngai ban ïaid.
“Ka jingïaid lynti kam pat kut hangne bad ka dang jngai bha,” u la ong bad bynrap ba ka jingkut jingmut, ka jingminot bad ka jinglong ryntih kan long kaba donkam bha ban pynurlong ïa ki thong jong ki.
