Shillong, Nailur 20
U Bah Ardent Miller Basawiamoit, President ka Voice of the Peoples Party (VPP) u la pynshai ba kam shym la don kano-kano ka mat treikam ne ka jingkular ka party, ba kan ai jait noh ha u ‘Kpa’ lada kan wan ha ka bor.
“Kane ka jingkynnoh kadei tang ka jingpyntieng bad pynsmiej ïa ki paidbah,” la ong u Bah Ardent haba kren sha ki lad pathai khubor.
U la ong ruh ba ka jingong ba lada wan ka VPP ha ka bor kan wanrah noh ïa ka aiñ ban ai jait noh ha u Kpa, kane kadei tang ka nia ilekshon.
“Haba ïadei bad ka kam shimet jong nga lei, nga la dep pynpaw ba kaei kadaw bad ka nongrim shimet jong nga. Kam shym la don bynta eiei bad ka party,” la bynrap u Bah Ardent.
Nalorkata, u Bah Ardent u la pynshai ruh halor ka jing ong ba ki MLA ka VPP kim don shuh ka jingsngewthuh jingmut namar ha ki jingïalang la don tang u MLA Mawlai bad MLA ka Nongkrem, hynrei ïa kane ruh ngi la dep ban pynshai bad u MLA ka Mawryngkneng, Bah Heavingstone Kharpran um ju poi ha ka jingïalang namar ka rta ruh ka la noh bad um lah shuh ban beh ha baroh ki jingïalang.
