Jowai, Nailur 20
Ki seng riewlum hapoh ka Jylla Meghalaya kiba ïateh lok bad ka BJP ki don hapdeng ka jingma namar ka BJP kan sa pynduh jait ïa ki kumba leh ha kiwei ki Jylla kum ha Odisha, West Bengal, Maharashtra, Bihar bad Madhya Pradesh nalor kiwei ki Jylla.
Ïa kane la ong da u President ka Meghalaya Pradesh Congress Committee (MPCC), Bah Vincent H Pala haba pynkup burom ïa ki nongkitkam bathymmai jong ka West Jaiñtia Hills District Youth Congress Committee ha St. Vianney Hall, Marian Hills, Jowai ha ka 19 tarik Nailur.
Hapoh Meghalaya, ka UDP, NPP bad BJP ki ïatreilang, mynta la jan baroh ki UDP kila khreh ïasoh sha ka BJP, bad dang ap sa ïa ka NPP, la ong u Bah Pala, da kaba bynrap ba ki NPP mynta kila sdang ban wad lad wad lynti ban leit pynïasoh sha ka BJP.
Haba kren sha ki nongkitkam, u Bah Pala u la kyntu ïa ki samla ban long kiba shlur bad ban ïatreilang khnang ba kan long ka jingmyntoi ïa ka party bad wanrah ruh ïa u soh ba bha ha kane ka ilekshon shiteng samoi ka ban wan.
Ha kane ka sngi la donlang u MDC ka Congress Ma Madonbai Rymbai, u MPYC General Secretary In-charge West Jaiñtia Hills DYC Derrick W Jyrwa, MPYC General Secretary In-charge Administration Norbert Jana Nongbet nalor kiwei kiwei.
