Mawkyrwat, Nailur 20
Ka Seng Samla Hima Langrin (SSHL) hapoh ka jingïalam u Bah Pynshailang Lyngdoh ha ka 19 tarik u Nailur, 2026 ka la pynlong ïa ka jingïalang paidbah ha Phlangdiloiñ, South West Khasi Hills District ban dawa ïa ka Sorkar Jylla ba ka dei ban siang rong noh ïa ka surok na Wahkaji, Phlangdiloiñ haduh Langpa bad ban shna thymmai noh ïa ka surok na Langpa kaba pynïasoh shaduh Ranikor kaba ki paidbah ka dong ka thaiñ ki la angnud la kumba 50 tylli ki snem.
U Bah Pynshai Lyngdoh haba ai jingkren ha ka jingïalang u la ther tyngeh ïa ka Sorkar Jylla kaba la ïeh noh khunswet ïa ka dong ka thaiñ ha kaba ïadei bad ka surok kaba ki paidbah ki la mad jingeh bad ïaid ïa ka lynti khohruh khohram la kumba 50 tylli ki snem khamtam ki longkmie kiba armet bun kiba la duh noh ïa la ka jingim shiteng lynti tang namar ka jingsniew palat ka surok.
Shuh shuh u la pynrem jur ruh ïa ka Sorkar namar ka Hima Langrin ka dei kawei na ki hima kaba la noh synniang bad pynmih bun ka khajna hapoh ka jylla lyngba u dewïong, mawshun bad kiwei.
“Ngi lah ban ong ba ka Hima Langrin ka la noh synniang shi bynta ïa ki nongtrei Sorkar hapoh ka jylla,” ong u Bah Pynshai.
Ka Sorkar ka leh kmen da kaba lum khajna napoh ka hima bad ka jingkylli ka long lada kane ka dong ka thaiñ ka pynmih ïa ka khajna kaba heh kaba lah ban kyrshan ïa ki nongtrei Sorkar bad lah ban kyrshan ïa ka Sorkar Jylla, hato ki paidbah ki donhok mo ban ïaid ïa kaba kum kane ka surok?.
Shuh shuh u la ther tyngeh ruh ïa u MLA ka thaiñ Bah Pius Marwein da kaba kynnoh ba u poi sha kane ka thaiñ tang shisien san snem, kata tang ha ka por ïalap ilekshon bad ka jingkylla kaba u wanrah ka long na ka san spah tyngka sha ka shi hajar bad na ka shihajar sha ka arhajar tyngka khlem kano kano ka roi ka par.
Kumta na ka liang ka Seng Samla Hima Langrin ka la aipor 6 bnai ïa ka Sorkar Jylla ban mang pisa ban siang rong ïa ka surok Wahkaji Phlangdiloiñ shaduh Langpa bad ban shna thymmai noh ïa ka surok na Langpa sha Ranikor khnang ban pynjan ïa ki paidbah bad ki tnad Sorkar bapher bapher kiba don ha Ranikor bad ki la byrngem ruh ba lada ka Sorkar ka dang ïai sngap mynthi bad kam lah ban pynurlong ïa ka jingdawa hapoh hynriew bnai ka Seng Samla kam banse ban ujor da ka PIL hapoh High Court halor kane ka kam.
