Shillong, Nailur 19
Ka Voice of the People Party (VPP) ha ka sngi Saitjaiñ jong ka taïew, ka la lum la lang ïa ki nongïalam ka party na baroh ki Konstitwensi ha ka ophis treikam ka party kaba don ha Nongkrem.
Ka party ka la khot tang kumba 30 ngut ki nongïalam na kawei pa kawei ka konstitwensi.
Kane ka jingïakynduh lang ki nongïalam ka party na ki Konstitwensi bapher bapher, ka long halor ban pynkhreh ïa ka ilekshon shiteng samoi sha Lok Sabha na Shillong Parliamentary Konstitwensi bad ban pynkhlaiñ ruh ïa ka party.
Ha kane ka sngi, ka VPP ka la ïoh ruh ban pynher ïa ka lama jong ka party.
Haba kren sha ki lad pathai khubor u Bah Ardent Miller Basaiawmoit u la ong, ba ki nongkyrshan ka VPP ha manla ki Konstitwensi ki skhem, ki khlaiñ bad ki la ïoh shisha ka jinghikai kaba paka tam na ka party.
“Ka la eh ïa mynta ban pynkhih ïa ka jingmut jingpyrkhat jong ki paidbah. Ka Shong ha ka jingtrei bha jong ki nongïalam ka party,” la ong u Bah Ardent.
U Bah Ardent u la ong ruh ba ki nongkyrshan ‘Prah’ ki kwah ba ka party kan pynthikna ban ïoh synshar ha u snem 2028.
“Ki nongkyrshan ‘Prah’ kim da pynleit jingmut than ha kane ka ilekshon shiteng samoi hynrei ngi ïohi ba kin dang pynkhlaiñ, ban pynthikna ba ha u 2028, ngim dei ban bakla bad ban ïoh kurup ïa ka bor synshar,” la bynrap u Bah Ardent.
