Shillong, Ïaïong 05
U Myntri ba khmih ïa ka Kam Jngohkai ha ka Jylla, Bah Paul Lyngdoh u la ong ba ka kam jngohkai hapoh ka Jylla ka la kiew stet bha, ha kaba u la pyntip ba tang ha Sohra haduh 350 tylli ki ïing basa ‘home stay’ ki la don.
U la ong ba ka tnat ka la pyntreikam ïa ki Standard Operating Procedure (SOP) ban peit bha ïa ka jingwan ïuhkjat jong ki nongjngohkai sha ka Jylla, da kaba pynthikna ba kan ym don kano-kano ka jingktah ne pynjulor ïa ka mariang sawdong sawkun.
Haba pynpaw ïa ka jingdonkam ban don ki kyndon kiba pyrkhing ban peit ïa ka jingwan poi ki nongshang kai, u la ong ba ka jingeh ka long ba ka Sorkar Jylla kam dei kaba pynïaid ne peit hi ïa ki jaka jngohkai.
“Kiba bun ki jaka jngohkai ki dei kiba long trai hi da ki paidbah, da ki kynhun bad dorbar shnong”, u la ong.
U la ai nuksa ba ka jingkieng jri ba armala ka hap ha ka jingpeit jong ka Nohriat Dorbar bad ka krem ha Arwah ka dei kaba peit da ka dorbar shnong hangto.
“Kaei kaba ngi la leh ha ki shisnem ba la dep, ngi la pynlong ïa jingïamir jingmut bad ka jingai jinghikai ïa baroh kiba don bynta hapoh ka kam jngohkai, kumno ba kin peit katkum ki kyndon ïa ka jingwan rung ki nongshang kai”, u la ong.
U la ong ba ka Sorkar ka la pynshai ba ka thong ka long ban don duna ki nongwan jngohkai, hynrei kiba wanrah jingmyntoi.
“Ka jingkwah ka long ym ban bun ki nongwan jngohkai, hynrei ki jait briew kiba lah ban pynmyntoi. Kane kaba ngi la ïasam bad ka dorbar shnong ba peit ïa ka krem Arwah, bad kane ngi dang bteng ban leh”, la ong u Bah Paul.
Namar ka jingkiew jong ka jingwan ki nongjngohkai ba nabar, u Myntri u la ong ba ki lad pynïasoh ki long kiba donkam bha na ka bynta ka jingwan ki briew na kylleng ka pyrthei.
“Ngi kwah ban ïohi noh ba ka jingpynheh ïa ka kad liengsuiñ kan sdang noh kloi. La pynthikna ïa ngi badha u snem 2026 ngi khmih lynti ba ka ‘runway’ jong ka Shillong Airport ha Umroi kan dep noh”, u la ong.
