Nongstoiñ, Ïaïong 06
Shi bynta ban wanrah ka jingïaieid bad ïajan hapdeng ki jaidbynriew Khasi bad Garo kiba sah ha ki thaiñ khappud jong ka Jylla Meghalaya, ka Federation of Khasi Jaiñtia and Garo People (FKJGP) Ri Muliang Circle ha ka sngi Saitjaiñ jong ka taïew ki la leit ban jngoh ïa ki ar tylli ki skul ha ka thaiñ Kyrshai kiba dang hap ruh hapoh ka Nongstoiñ C&RD Block jong ka Rambrai Jyrngam Konstitwensi.
Ha katei ka sngi ïa ka kynhun jong ka FKJGP la ïalam da u Bah Serbilin Lyngdoh, President ha ryngkat ka jingïadon lang ki dkhot bad kitei ki ar tylli ki skul.
Shuh shuh kitei ki ar tylli ki skul ïa kaba la FKJGP ka la leit ban jngoh ki kynthup ïa ka Umthli LP School bad ka Hasem UP School ha kaba ka seng ha katei ka jingleit jngoh kala ai sngewbha ruh da ki tiar ïalehkai.
Haba kren sha ki lad pathai khubor, u Bah Serbilin Lyngdoh u la ong ba ha ka jingwan jngoh ïa kitei ki skul kiba don ha khappud, ki la lap ba ki dang don shibun ki jingduna nalor ba ka thaiñ kam pat don ïa ka skul kaba don haduh ka kyrdan Secondary.
Kumta u la kyntu ïa u nongmihkhmat bad khamtam ïa ka Sorkar ba kan phai khmat lem sha katei ka thaiñ kaba dang donkam shibun ki kam pynroi.
