Shillong, Ïaïong 06
Ka jingsniew palat ka surok ha San mer ha ka lad ban leit sha Lum Shillong bad Mawklot ka la ktah shisha ïa ka leit ka wan ki paidbah khamtam eh ïa ki kali kit mar namar ka jingsahkut ki kali kiba wan na Shillong ban leit sha Hynñiew Mer namar ba ka dang ïaid ka jingshna ïa ka surok 4-Lane.
Kane ka jingsahkut ka dei namar ki kali kiba kit mar ne kiba kit bun briew kim lah shuh ban kiew ynda ki la poi ha katei ka bynta jong ka surok kaba sniew bad long thliew.
Ïa kane ka surok 4-Lane la ïohi ba ha San mer haduh Sawmer, ka kompeni ka la dep siang rong baroh arliang hynrei kaba dang sah khongreng ka dei tang ha San mer ka lad ban kiew sha Lum Shillong kaba pynlong ïa ki kali ba kin sahkut.
Kham bun na kine ki kali ki dei kiba hiar na Shillong sha Hynñiew Mer. Ka jingsniew kane ka surok ka long haduh ba ki don ki jaka ba long thliew kumta ki kali kim lah shuh ban kiew bad dei hangne ba don sa ki kali kiba rung bad mih na Lum Shillong bad Mawklot kaba la pynsahkut lut ïa baroh ki kali khamtam kiba kiew na Hynñiew Mer sha Shillong bad kiba hiar na Shillong sha Hynñiew Mer.
Ka jingsahkut ki kali khamtam ha kane ka surok 4-Lane ba dang shu dep shna ha San Mer la sakhi ruh shi lynter ka surok ki kali ki la sahkut da ki kynta khamtam lei lada ym don ki pulit pynïaid kali, ki kali ki ïa rung ïa mih katba mon kaba wanrah shuh shuh ïa ka dheng kali.
Ha ka janmiet jong ka sngi Saitjaiñ ha ka por 4 shiteng eiei, ki kali ki la sahkut naduh San Mer haduh Hynñiew Mer. Ha ka por 6 duna eiei, ki pulit pynïaid kali ki la wan poi ha katei ka jaka ban pynïaid ïa ki kali bad ki kali ki la sdang ban ïaid beit wat la katta ruh ynda ki la poi ha kane ka jaka kaba long thliew ka surok, ki kali ki dang sahkut biang namar ka buh jingeh ïa ki kali kiba kit mar bad ki kali rit namar lada ki kit bun palat kim lah shuh ban kiew ïa katei ka surok kaba la pynsahkut lang ïa ki kali kiba bud nadien.
