Imphal, Ïaïong 06 (UNI)
Saw ngut ki lehnoh ki la shah kem ha Manipur ha kine ki 24 kynta ba la dep ha ki saw tylli ki jingkhynra ba la pynlong.
Ki pulit ha ka Sngi U Blei ki la ïathuh ba ki bor pahara ki la kem ïa uwei u dkhot ka UPPK katba ki dang pynlong ïa ka jingkhynra ha ka thaiñ Hiyanglam Tera Pishak bad ka thaiñ Hiyanglam Mayai Leikai kaba hap hapoh ka Hiyanglam-PS, Kakching distrik.
Ha kawei pat ka jingkhynra, ki bor pahara ki la ïoh ban kem ïa uwei u dkhot ka KCP(PWG) na surok Moirang Okshongbung Shribon IV kaba hap hapoh Moirang-PS, Bishnupur distrik.
Ha kajuh ka por, ki pulit ka Manipur ki la kem sa ïa uwei pat uba dang hapoh 18 snem ka rta uba la kynnoh ba u dei dkhot ka KCP (MC Progressive) na Nambol Bazar kaba hap hapoh Nambol-PS, Bishnupur distrik ha kawei pat ka jingkhynra.
Ha ka jingjia kaba saw, ki pulit ka Manipur ki la kem ïa uwei u dkhot ka KCP (PWG) ha ki sawdong jong ka Potshangbam, Toupoki bad ka thaiñ Ningthoukhong kaba hap hapoh Bishnupur-PS, Bishnupur distrik.
Ïa ka jingkhynra bad ka jingpyni bor synshar ïa ki jaka la pynlong da ki bor pahara ha ki distrik jong ka Imphal East bad Jiribam.
Na ka shnong Keirao Wangkhem kaba hap hapoh Andro-PS, Imphal East distrik, la ïoh kurup ïa kawei ka suloi ‘Carbine Sten Gun’ ha ryngkat ka ‘Magazine’, saw tylli ki pistol 9 mm ha ryngkat ki ‘Magazine’, kawei ka suloi .22 ha ryngkat ka ‘Magazine’, lai tylli ki suloi ’12 Bore Single Barrel’, 2 tylli ki ‘Hand Grenade’ bad ki ‘detonator’, ki kuli lem bad kiwei-kiwei ki tiar.
Shuh shuh la ïoh kurup ïa 3 tylli ki suloi DBBL, kawei ka suloi SBBL ba la shna ha ka ri, kawei ka suloi SBBL, ki kuli na Kamranga kaba hap hapoh Jiribam-PS, Jiribam distrik.
