Nongpoh, Ïaïong 06
Sa shisien pat kawei ka samla pule na ka thaiñ Umden ka la wanrah nam bad burom ym tang ïa ka ïing ka sem bad ka skul kaba ka pule, hynrei ïa ka thaiñ bad ka Ri Bhoi District hi baroh. Kane ka long hadien ba ka la lah ban pass bha ha ka eksamin jong ka Secondary School Leaving Certificate (SSLC) hadien ba la pynbna risol da ka Meghalaya Board of School Education (MBOSE) ha ka sngi Saitjaiñ.
Ka samla Lawanbiang Sarika Mallai ka dei kaba pule ha ka skul St. Joseph Higher Secondary School, Umden Nongtluh kaba la wan ha ka kyrdan 12 jong ka Top 20 ka risol SSLC ha ka jylla.
Kum ban shu kdew, ka MBoSE ha ka risol kaba la pynmih, ka la thoh ïa ka skul ba pule ka samla Lawanbiang Sarika Mallai kum ka St. Joseph Higher Secondary School, Umden Nongthliew ha jaka Umden Nongtluh, kaba la pynlong ïa kiba bun ban kulmar jingmut lane kane ka jaka, ka dei na Ri Bhoi ne em.
Lyngba ka jingrung jong ka samla Lawanbiang ha ka kyrdan ba 12, ka jingdon jong ki samla Ri Bhoi kiba la ïoh rung ha ka thup Top 20 mynta ki long san ngut nalor u Sourav Pandey (Alpha English Higher Secondary School, Nongpoh) ha ka kyrdan ba 3, ka Nandini Kumar (Alpha Higher Secondary School, Nongpoh) ha ka kyrdan ba 6, ka samla Queency Kharsohnoh (Umroi Presbyterian Secondary School, Umroi) ha ka kyrdan ba 7 bad ka samla Ineshabakor Nongrum (Nehru Memorial Secondary School, Umsning) ha ka kyrdan ba 14.
Haba ïoh ban ïakren, ka samla Lawanbiang ka la pynpaw ïa ka jingkmen ba ka lah ban poi sha kane ka thong bad ïathuh ba ka jingtrei shitom bad ka jingminot hi ka dei kaba pynlong ïa ka ban poi ha kane ka kyrdan kaba 12 ha ka jylla.
Ka la ïathuh ruh ba ka ju pynlut por kumba 5 kynta manla ka sngi ban khreh kot bad minot ha ki kot ki sla bad pynpaw ba ka don ïa ka jingangnud ban leit pule ha ka laiñ Saïan (Science) bad ban ïai minot bad leh bha shuh shuh ha ki kyrdan kiba kham shalor nangne shakhmat. Ka samla Lawanbiang ka la kyntu ruh ïa ki para samla, khamtam ïa kito kiba na ka thaiñ nongkyndong kum maka, ba kin trei shitom bad minot ha ki jingpule ki jong ki ba kin lah ban poi sha ka thong kumba ki thmu.
Na ka liang u Principal ka St. Joseph Higher Secondary School, Fr. Joakim u la pynpaw ba na ka liang ka Managing Committee bad ka skul hi baroh kawei ka dap da ka jingsarong bad ka jingkmen ba khraw halor ka jinglah jong ka samla Lawanbiang ban wan ha ka kyrdan ba 12 jong ka Top 20 ha ka jylla bad ïathuh ba kane ka dei ka sien ba ar ba ka skul ka la ïoh rung biang ha ka thup Top 20 jong ka risol SSLC, hadien u samla Marcel Lyngdoh uba la ïoh ïa ka kyrdan ba 18 jong ka risol SSLC ha u snem 2014. U la ong ruh ba kum ka skul hi baroh kawei, ka dap da ka jingsngewnguh ïa ka jingkut jingmut jong ka samla Lawanbiang ban poi haduh kane ka thong bad bynrap ba kum ka skul bad ki nonghikai, ki kitbok kitrwiang ba kan dang lah ban leh bha shuh shuh ha ki kyrdan ba kham shalor.
Shuh shuh, na ka liang u Fr. Joakim u la ai khublei kyrpang ruh ïa ki samla pule ka skul kiba la pass bha ha ka risol SSLC wat lada kim lah ban rung ha ka thup jong ka Top 20, hynrei ba ki samla pule kiba wan hadien kin bud ïa ka nuksa ka samla Lawanbiang Sarika Mallai.
