Shillong, Ïaïong 06
Ka samla Leisha Agarwal kaba dei ka khynnah kaba la wan ha ka kyrdan banyngkong ha ka thup kyrteng jong ka risol Secondary School Leaving Certificate (SSLC) ba la pynbna da ka Meghalaya Board of School Education (MBOSE) ha ka sngi Saitjaiñ jong ka 5 tarik u Ïaïong, 2025 bad pule ha ka skul St. Margaret’s Higher Secondary School, Shillong, ka la pynpaw ïa ka jingsngewkmen kaba khraw hadien ba ka la ïoh ban poi haduh kane kyrdan banyngkong jong ka thup.
Ka Leisha ka la ong ba ka dap da ka jinglyngngoh namarba ka khlem khmih lynti satia ban poi shaduh katei ka thong.
Kane ka samla pule ka la pynpaw ïa kane ha ka jingïakren bad ki lad pathai khubor lyngba ka ‘Conference Call’ namarba kam shym la don satia ha Shillong.
Katei ka samla ka la ai khublei ruh ïa baroh ki nonghikai jong ka namar khlem ka jingïarap jong ki, kan ym poi satia sha kane thong bad ka la ai khublei ruh ïa la ki bahaïing-bahasem kiba don bynta ha ka ban ai mynsiem ïa ka na ka por sha ka por.
Ka Leisha ka la kyntu ruh ïa kiwei pat ki para khynnah ki ban ïaleh ïa ki eksamin hadien jong ka ba lada ki kwah ban poi sha ka thong, ki dei ban trei shitom bad ban pynleit jingmut ha ka kot, ban ym tieng ne riej hynrei ban long jai-jai, ban skhem jingmut bad ban ïashim bynta ha ki prokram bapher-bapher namar ka long kaba donkam bha bad ruh ban pule da ka jingtip ym ban shu pule tang ban kynmaw ïa ka kot.
“Lada phi don kano-kano ka thong, phi dei ban ïai trei shitom bad ban ai met bad mynsiem bad ban pynleit jingmut bha bad phi ruh phin sa lah ban ïoh kheit ïa u soh ka jingjop”, ong katei ka samla.
