Mawkyrwat, Ïaïong 07
Ka Federation of Khasi Jaiñtia & Garo People (FKJGP) South East Khasi Border Circle ha ka 7 tarik u Ïaïong, 2025 ka la bat ïa ki trok kiba kit coke kiba ïaid ha ka por mynsngi lyngba ka surok Weiloi Umpung, East Khasi Hills District.
Katkum ka kyrwoh khubor na u Bah Kyrmen Shangdiar kum Presi-dent, u la ong ba ka jingbat ka seng ïa kine ki trok ka dei hadien ka jingleh mynthi ki bor distrik wat hadien ba ka seng ha kine ki snem ba la dep, ka la dep ban ujor bad phah jingthoh sha ki bor distrik halor ka jingsniew bad ka jingrit palat ka surok na Weiloi shaduh Balat haduh jingkieng Umpung bad ka seng ka la kyntu ruh ban pynsangeh shipor ïa ka jingïaid ki trok kit coke ha ka por mynsngi namar ka pynthut ïa ka ïaid ka ïeng jong ki paidbah, khamtam ha ka sngi ïew bad ki kali kiba kit ïa ki nongpang katno ka pynsohsat namar ka jingsniew bad ka jingrit ka surok.
U Bah Kyrmen Shangdiar u la ong ruh ba ka seng kam don kano-kano ka jingsngew pyrshah ïa ka khaïi-pateng jong ki kynhun ne riewshimet hynrei ka jingïaid jong ki trok ha ka por mynsngi ka pynthut ïa ka leit ka wan u paidbah khamtam ha kum kane ka por ba ka don ka jingmaramot ïa ki surok.
Kumta ka seng lyngba kane ka kyrwoh, ka kyntu ïa ka Sorkar ba ka dei ban pynheh noh ïa kane ka surok bad ban pynsangeh shipor ïa ka jingïaid ki trok ha ka por mynsngi na ka bynta ka bit ka biang jong ki paidbah nongshong shnong jong ka thaiñ Mawsynram baroh kawei.
