Shillong, Ïaïong 07
U Myntri tnat Bording ka Jylla, Abu Taher Mondal u la ong ba ha ki snem ba la leit ka Jylla ka hap ha ka kyrdan D, ha kaba ïadei bad ka jinglong jingman ka bording, hynrei mynta ka la kiew sha ka C.
“Kane ka jingnang kham biang ka rukom sam ding ilektrik sha ki paidbah ka long namar ba ka MeECL ka la shim ïa ki sienjam ban pynbha ha kine ki snem”, u la ong.
U Myntri u la ong ba ka jingsam bording ha kane ka snem ka la kham bha bun shah ban ïanujor bad kiwei ki snem.
“Mynta u snem kam don shuh ka jingpynlip ding kumba la jia ha u snem 2023, ha kaba la pynlip ding 8-9 kynta ha ka shisngi. Mynta u snem ka jingpynlip ding ka dei tang namar ba don ka jingmaramot ïa ka jaka sam bad pynmih bording bad ka jingthut malu-mala na ka bor mariang, lait na kita kam don ka jingpynlip ding”, u la bynrap.
U la ong ba ka jingduhnong na ka jingsniew ki tiar, bad ka jingbym siew bai thang bording ilektrik, ka la hiar na ka 35 percent sha ka 17 percent mynta u snem.
U la ong shuh-shuh ban pynkhlaiñ ïa ka tnat sam bording ka jylla, ka long ba ki paidbah bad ki kompani ki dei ban siew thikna ïa ka bai thang bording.
Katkum ka jingïathuh u Myntri, ka MeECL ka don ka ram ha ka NTPC kumba T. 565 klur bad ïa kane ka ram yn pynkhuid ha u snem 2026 namar ba ka MeECL ka siew man u bnai kumba T.15.7 klur sha ka NTPC.
Ha kajuh ka por, u la pyntip ba ka MeECL ka la pynheh ïa ki station sam bording ha kylleng ki jaka, kynthup ha nongbah Shillong bad Tura, da kaba pyrkhat lypa ba ka jingnang bun ka jingdawa bording ha Sor Shillong Thymmai bad ha Tura.
U Mondal u la ong ruh ba shisien ba la pyntreikam da u Smart Meter, yn sa tip kaei kaba jia lada don kano-kano ka jingthut ne ka jingjia ha kaba ka jingtip kan poi sha ka ophis ka MeECL ba kan pynbeit wut-wut.
Halor ka jingshah kynthoh ha u nongïalam ka Liang Pyrshah, Dr. Mukul Sangma hapoh ka dorbar, halor ka jingbym biang ka rukom treikam ka MeECL, u Mondal u la ong ba u sngew tynnat ïa ka jingai jingmut bad u kloi ban pynbeit haba don ka jingduna ne ka jingdkoh.
U Myntri u la pyntip ba ka tnat ka la thied ruh 6 tylli ki kali shna bording ne ‘hydraulic vehicle’ ban pyndonkam ban leit shna haba don ka jingthut ha ka bording, ka jingkhyllem ki post ilektrik bad kiwei kiwei ki kam.
“Hynrei, kaba kongsan ka long ban pynkhlaiñ shuh-shuh ïa ka jingpynmih bording khnang ban pyndap ïa ki jingdonkam bording ka Jylla kaba nang heh nang khraw katba nang ïaid ka por”, la ong u Mondal.
