Jowai, Ïaïong 07
Ka Chad Sukra ka Seiñraij Jowai halor ka phang “Ah Bei? Ah Bei Rymaw, Yi cha Bei ka Nongkylliang” ha ka 6 tarik Ïaïong ka la long kaba ïaid beit ïaid ryntih bad iphuh-iphieng wat hapdeng ka jingther jong u slap ryngkat bad u phria.
Ka Chad Sukra ka la sdang ha ka miet 5 tarik da kaba la pynlong ïa ka sawangka kaba ai kyrteng ‘Thij Chwa’, katba ka 6 tarik pat ka dei ka sngi ‘Mih Iaw’.
Ha ka jingïalang kaba la long ha madan Ryngkaw kaba don ha Tpep Pale, la wan ban sakhi da u Symbud Myntri Rangbah ka jylla Ma Sniawbhalang Dhar uba la synñiang ruh 50 hajar tyngka sha ka Seiñraij Jowai.
La ïoh ka jingkren pdiang na u President ka Seiñraij Jowai Ma Hercules Toi, ka jingkren halor ka phang na u Ma Dawanpoi Passah, Executive Member, Seiñraij Jowai bad ki kyntien khublei na u General Secretary Seiñraij Jowai Ma Arwotki Sumer.
Hadien ka jingïalang ka la don ka jingshad surok ne shad Mih Iaw ha kaba baroh ki khun ka Seiñraij ki la ïa shad kymbrum ryngkat ki sur ki rwai kiba pynsawa ïa ka shnong ka thaw naduh na madan Ryngkaw haduh ban da poi ha Iawmusiang.
Ha Iawmusiang la wan ban sakhi da ki paid riewngeit ryngkat ki riam ki beit kiba iphuh-iphieng kumjuh ki sur shad sur rwai ba sngew thiang sngewtynnad kiba mih lyngba ki tiar put tiar tem u mynbarim.
Ki samla kynthei shynrang ha ki dong ki shnat ka shnong Jowai kumjuh ki shnong marjan ryngkat ka Seng Khasi Mawsynram ki la shim bynta lyngba ki jingshad bapher bapher.
Ka ‘Chad Sukra’ ka dei ka jingshad kaba ki Pnar ki pyni ïa ka dustur ka riti bad la pynlong ïa katei ka jingshad ha shwa ban bet ïa u symbai u phniang ha ki hali ki pynthor kum ka dak ban ai nguh kyrpang ïa ka mei mariang kaba ai bam ai dih lyngba ki soh ki pai bad ai jaka shong jaka sah halor ka met ka phad jong ka.
Hadien ka jingshad na Iawmusiang, ka la don pat ka jingshad surok bad leit sha ki bynta bapher bapher jong ki dong ki shnat ka shnong Jowai.
Katba ha ka por mynmiet kaba dei ka bynta kaba khatduh jong ka shad Sukra ka la don ka jingshad ‘Kper Syntu’ na ki dong ki shnat ka Jowai ba la pynlong ha Iungwalieh Iongpiah.
