Jowai, Ïaïong 07
Ka Synjuk Waheh Shnong Ri Jaiñtia (SWSRJ) ka pynpaw ka jingsngewnguh bad dap da ka jingsngew -kmen ïa u Myntri ka tnat Food Civil Supplies & Consumer Affairs ka Sorkar Jylla Ma Coming -one Ymbon, u Commi-ssioner & Secretary FCS & CA P Bakshi, IAS, ka Director FCSCA ka S Verma, IAS, halor ka jingshimkhia ban khot ïa baroh ki khlieh nongsynshar shnong jong ka Jylla ban ïasyllok bad phylliew jingmut ha kaba ïadei bad ka kam bam khaw rashon hapoh ka jylla.
Ïa ka jingïalang phylliew jingmut kaba la long ha ka 4 tarik Ïaïong lyngba ka Video Conference ha Main Secretariat Con-ference Hall, Shillong la ïashim bynta da ki khlieh nongsynshar shnong kynthup ka Synjuk Waheh Shnong Ri Jaiñtia (SWSRJ), Synjuk ki Nongsynshar Shnong ka Bri u Hynñiewtrep, Synjuk Rangbah Shnong Ri Bhoi, kumjuh ki Nokma Council jong ka rilum Garo bad ki seng trei mon sngewbha.
U President ka Synjuk Waheh Shnong Ri Jaiñtia, Ma A Lipon u la ïathuh ba ha katei ka jingïalang la ïakren ïa phylliew jingmut kumno ban pynsngewthuh sha baroh ki nongbam khaw rashon hapoh ka jylla na ka bynta ban pynïasoh bad u Aadhaar card bad ban leit pynïasoh da kaba leh ïa ka eKYC ha ki Fair Price Shop ne Dealer Centre ha ki shnong jong ki.
Nalorkata, ban ïarap pynsngewthuh ruh ba ym dei ban tieng ban shon Aadhaar, ïa kito kiba ym pat dep ban shon ban lait na kaba shah pynduh khaw rashon, namar ka Sorkar Kmie ka la shim bad bthah ïa baroh ki jylla ba kim dei ban pynslem shuh ban pyndep ka shon Aadhaar bad leh ïa ka eKYC ba ïadei bad ki nongbam rashon lym kumta kin sa shah pynduh khaw rashon noh hadien ka 30 tarik Jylliew (June) 2025.
U la ong ruh haba bishar ïa baroh ki jylla, ka Meghalaya ka dang duna bha shaba palat ban shon Aadhar, kumta ha kaba ïadei bad kane u la ong ba u Myntri Ma Ymbon u la pynpaw ka jingsngew bynñiaw khamtam ïa ki duk ki suk lada ki shah pynduh khaw rashon tang na ka daw ba ki tieng ban shon Aadhaar ne pynïasoh lyngba ka eKYC ne Epos Machine ha Fair price Shop center jong ki.
U la ong ba u Myntri u la ban jur bad kyntu ïa baroh ki nongtrei ka Supply naduh ki Deputy Commissioner Supply, ki nongsynshar shnong, ki Nokma Council, bad kiwei kiwei ki nongtrei mon sngewbha ban pynleit jingmut ban ïarap pynsngewthuh katba lah ba ki nongshong shnong jong ka jylla Meghalaya kin shon Aadhaar bad pynïasoh hapoh kine ki lai bnai ha shuwa ban dier ka por ne ka lad ba khatduh ïa baroh ki nongbam khaw rashon.
Ha kaba ïadei bad kane, na ka liang ka Synjuk Waheh Shnong Ri Jaiñtia (SWSRJ) ka khot ïa baroh ki para-ri ban wan shakhmat khlem jingtieng bad jingartatien ban shon Aadhaar Card noh bad pynïasoh noh ïa ka eKYC ne Aadhar Seeding of Ration Cards.
