Shillong, Ïaïong 07
Ka Sorkar Jylla ka la ïaid shaid-shaid ha ka kam ban thung noh ïa u/ka Chairperson ba thymmai hapoh ka Meghalaya Lokayukta, hadien ba la shongthait noh u Bah Bhalang Dhar, IAS (retd.) kum Chairperson ha ka 28 tarik Rymphang mynta u snem.
Ka Meghalaya Lokayukta ka khlem lah treikam shuh mynta la palat shibnai, hadien ba la kut ka samoi treikam jong u Bah Dhar, bad kam lah shuh ban pdiang ïa ki jingujor namar ka treikam beit tang da u Chairperson khlem don da kiwei pat ki dkhot.
Haba wad jingtip halor ka jingslem ban thung ïa u/ka Chairperson ba thymmai, na ka liang u Commissioner & Secretary, Bah CVD Diengdoh (IAS) u la pyntip ba ki don ki kyndon kiba hap ban bud ryntih bha ban thung ïa u/ka Chairperson hapoh ka Meghalaya Lokayukta.
Katkum ka jingpyntip une u heh ophisar, ka Sorkar ka la thung ïa ka Search Committee ba la khlieh da u Bah Peter Dkhar, IAS (retd.), bad kane ka committee ka la pynmih ïa ka jingpynbna khot aplikeshon ha ka taïew ba la dep, bad ïa ka tarik ba khatduh ban phah ïa ki aplikeshon la buh ha ka 25 tarik mynta u Ïaïong. U la ïathuh ruh ba ka Search Committee hadien ba ka la ïoh ïa baroh ki aplikeshon kan sa jied 3 ngut kiba biang tam katkum ki kyrdan kiba long katkum ka Meghalaya Lokayukta Act, bad hadien kata kan sa phah ïa ki kyrteng sha ka Selection Committee ba khlieh da u Myntri Rangbah ka Jylla.
U Chairperson ba nyngkong hapoh ka Meghalaya Lokayukta dei u Justice (retd.) P K Mushahary uba la shimti naduh u Naiwieng 2018 haduh u Jymmang 2021, bud pat sa u Bah Bhalang Dhar, IAS (retd.) uba la shimti naduh u Rymphang 2022 haduh u Rymphang 2025.
