Shillong, Ïaïong 07
Ki rawon kiba dang don ha lynti ban leit khwai sha wah ki la lap ïa kawei ka metïap jong u rangbah briew ha ki bynta jong ka khlaw kaba don hajan ka riat bad mar kumta ki la pyntip noh sha ki bor ba dei peit.
Hadien ka jingïoh jingtip ka kynhun Search and Rescue Team jong ka tnat Fire and Emergency Service ha ka lah sngi U Blei ka la leit ban sei ïa noh ïa katei ka metïap jong utei rangbah briew na ka riat kaba jrong 200 mitar eiei ha ka shnong Umsaw-Mawjynrong kyntoit Wahkdait ha ka surok By-pass bathymmai jong ka shnong Mawlai.
Ha kaba ïadei bad kane, na ka liang u Rangbah Shnong jong ka Umsaw Mawjynrong, Bah Rapborlang Mawthoh, u la ïathuh ba ïa kane ka metïap la lap da ki rawon katba ki dang thmu ban leit khwai sha ka wah kaba don ha kane ka jaka ha kaba ki la pyntip noh mar-mar sha u Secretary jong ka shnong Umsaw Mawjynrong, Shillong.
Uwei na ka kynhun ki rawon kiba la lap ïa kane ka met, u la ïathuh katba ki dang hiar sha wah, ka la wan shwa ka jingsma iwtung bad kham katto-katne ki la lap ïa ka khlieh kaba la sah satang ka shyieng bad sa ka met kaba pyut kaba la lait la ka jong ka jong. La ïathuh ba une u rangbah uba la jah naduh ka 21 tarik, Lber, 2025 u dei ba shong ba sah ha ka shnong Umlyngka, Upper Shillong hynrei uba poi shongkha ha ka shnong Umsaw Mawjynrong.
Ïa ka met jong une u rangbah la pynkit noh da ki pulit jong ka thanat Mawlai sha Shillong Civil Hospital na ka bynta ban leh ïa ka post mortem shwa ban aiti pat sha ki bahaïing ban pyndep ïa ka jinglehniam khatduh.
