Jowai, Ïaïong 07
Ka San Shnong Fishing Association (SSFA) kaba kynthup ïa ka shnong Mynsang, Mawdulop, Mawsir, Ksanrngi, East Khasi Hills District bad Sohmynting West Jaiñtia Hills District ka la maham tyngeh ïa kino kino kiba pynïap dusmon ïa ki dohkha kiba don ha ka wah Umngot ba hap hapoh u pud u sam jong ka San Shnong.
Ka San Shnong ka la khang pyrshah ba ym bit ban leh dusmon ïa ki dohkha dohpnat da kaba siatbom, wieh tutia lane dawai bun jait, tied tyrnem, khyndang lyngka.
Ym shah shuh ban tong sasi mynmiet bad ka por khwai ym dei ban palat ïa ka 6 baje janmiet. Ka SSFA ka maham ba lada ka lap ïa kino kino kiba leh pyrshah kan pynshitom ïa ki katkum ki kyndon aiñ treikam ka synjuk bad ban aiti ruh sha ki bor jong ka aiñ.
