Shillong, Ïaïong 07
Ka Khasi Students’ Union (KSU) Nongmensong Unit ha ka Sngi Saitjaiñ ka la ïoh ban ai sngewbha da katto-katne ka jingïarap ka ban kyrshan ïa 5 ngut ki khynnah kiba la pynpule da ka seng bad kiba la ‘pass’ ïa ka eksamin SSLC.
Kum ban shu pynkynmaw, ka Seng ka la sdang ïa ka ‘Free Education Camp’ naduh u snem 2011 bad ka dang ïaid beit haduh mynta ka kynti bad ki don 24 ngut ki khynnah skul bad 5 ngut kiba lah pyndep ïa ka eksamin SSLC.
Ka Seng ka dap da ka jingkmen kaba khraw mar sien tip ïa ka khubor haba ki khynnah pule ki lah ïoh ban kheit ïa u soh ka jingjop.
Ha ka jingïalang kaba la pynlong, lah pynshngaiñ da ka jingdon ryngkat lang u samla Shelkitbok Kharbani (Asst. Education Sect. C.E.C), Jeremaiah Pohtmi (President Nongmensong Unit) bad u Banjoplang Dkhar (Organising secretary Shillong Mihngi Circle) lem bad ki para dkhot.
U President ka Nongmensong Unit u la pynpaw ka jingsngewkmen kaba khraw bad u lah pynsngew ba ka jingjop jong ki khynnah pule ha kane ka eksamin ka dei ruh ka jingjop jong ka seng, kumjuh ka khyrdop jingsdang na bynta ki khynnah pule kiba lah lait ïa kane ka eksamin.
