Nongpoh, Ïaïong 07
Ha kawei ka jingjia tyngkhuh kali kaba ishyrkhei kaba la jia ha ka miet shiteng synñia jong ka Lah Sngi U Blei, ar ngut ki rangbah ki la khlad noh hashen hadien ba ka kali Maruti Alto kaba ki shong ka la leit ban tynrah nadien jong ka trok kat haduh ba ki bynta ba shakhmat jong ka kali ka la pra hi phom.
Katkum ka tyllong khubor na ki pulit, la ïathuh ba kane ka jingjia ka dei ha ka por kumba 12:05 baje shiteng synñia katba katei ka kali Maruti Alto kaba don ïa u registration number ML05-R-8598 ka dang thmu ban hiar sha nongbah Guwahati na Shillong.
La ïathuh ba ynda poi ha ki bynta jong ka surokbah National Highway 6 ha Umlyngkdait, katei ka kali Maruti Alto ka la leit ban tynrah nadien jong kawei ka trok kaba bym lah satia ban ithuh. La ïathuh ruh ba katei ka trok, ka la phet bak na katei ka jaka khlem don satia kiba ïoh ban bat.
Na ka liang ki bor pulit kiba la poi mar-mar ha kane ka jingjia ki la pynkit noh ïa kitei ar ngut kiba la khlad ïa kiba la tip kyrteng kum u Robi Paswan, 30 snem ka rta na Lumparing, East Khasi Hills uba dei u nongñiah jong ka kali bad u Prakash, 26 snem ka rta na Vasanthanagar, Bangalore, sha Civil Hospital Nongpoh katba ïa ka kali pat la rah noh sha thanat Nongpoh.
