Shillong, Ïaïong 07
U Myntri Rangbah ka Jylla, Conrad K Sangma, u la pynpaw ïa ka jingdonkam jong ki Jylla ka thaiñ Shatei Lam Mihngi ban ïatreilang na ka bynta ban kyntiew ïa ka kam jngohkai ha ka thaiñ baroh kawei.
U Conrad u la pynpaw ïa kane ha ka jingïalang jong ka High Level Task Force (HLTF) ba nyngkong eh halor ki kam jngohkai kaba la long ha ka Lah Sngi U Blei, bad ha kane ka jingïalang la ïashim bynta lang da u Myntri ka tnat DoNER, Jyotiraditya M Scindia, u Myntri Rangbah ka Sikkim, Prem Singh Tamang, u Myntri Rangbah ka Tripura, Dr. Manik Saha bad ki heh ophisar na ka Sorkar Pdeng bad ki Sorkar Jylla.
“Ki nongshangkai pyrthei na kylleng ka Ri India bad ki ri ka pyrthei ki ithuh ïa ka thaiñ Shatei Lam Mihngi kum kawei beit, kumta ka long kaba kongsan ba ki Jylla kin ïatreilang ïajan bha ha kaban kyntiew ïa ka kam jngohkai”, la ong u Conrad.
Ha kane ka jingïalang la ïakren sani halor ki rukom treikam ki ban sei pyrthei ïa ka spah ha ka kam jngohkai jong kane ka thaiñ Shatei Lam Mihngi.
U Conrad u la ïaroh ïa u Myntri ka DoNER uba la shim khia ban thaw ïa ka Task Force, kaba u la ñiew kum ka sienjam ba kongsan bha ban kyntiew ïa ki kam jngohkai ha ka thaiñ Shatei Lam Mihngi baroh kawei.
U la ong ba ka thaiñ Shatei Lam Mihngi ka la wanrah ïa ka Industrial Policy bad ka la plie lynti ïa ka jingroi jong ki karkhana.
Haba kren ha ka jingïalang, na ka liang u Myntri ka DoNER, Jyotiraditya Scindia u la ong ba ka thaiñ ka lah ban shim kabu ïa ka spah pateng la pateng bad ka jingitynnad ka mariang ban pyntyllun ïa ka roi ka par, ban kyntiew ïa ka ïoh ka kot ki nongshong shnong bad ban pynkha ïa ka lad ïoh kam ïoh jam.
Ka Task Force kaba la thaw da ka DoNER Ministry ba la khlieh da u Myntri Rangbah ka Meghalaya, Conrad K Sangma kan bishar ïa ki lad ki lynti ban kyntiew ïa ka kam jngohkai jong ka thaiñ, ban ai jingmut ïa ki sienjam ba donkam ban shim, ban ithuh ïa ki jingduna bad ban ai jingmut ïa ka lynti ïaid na ka bynta ka roi ka par ba pura ha ka kam jngohkai hapoh ka thaiñ.
U Scindia u la ai jingmut ba dei ban peit ïa ka rukom treikam jong ka ri Thailand, Cambodia, Vietnam bad kiwei ki ri ha South Asia ban kyntiew ïa ki kam jngohkai bad ruh ban thaw ïa la ka jong ka rukom treikam ka ban nang kyntiew shuh-shuh ïa ki kam jngohkai jong ka thaiñ.
Ïa kane ka Task Force la thaw hadien ka jingïalang Plenary ba 72 jong ka North Eastern Council (NEC) ba long ha u Naiwieng, 2024 ha Agartala, Tripura. Ïa kane ka Task Force la thaw da ka DoNER Ministry ha ryngkat ka jingïatreilang bad ka Tourism Ministry.
