Shillong, Ïaïong 07
Ki shipai ïada khappud Border Security Force (BSF) ki la kem noh ïa uwei u briew uba dei na ka ri Bangladesh uba ju donkti ban pynrung tuh ïa ki briew ha khappud. La kem ïa une u briew najan ka khappud Indo-Bangladesh ha ka 6 tarik mynta u bnai.
Haba bud ryntih katkum ki khubor syntiat, ki shipai BSF jong ka 4th Battalion, kiba don hajan Dawki ban peitngor bha ha katei ka thaiñ ki la ïshan khmat bha ïa ka ïaid ka ïeng jong u hajan khappud Bangladesh.
Une u briew u la pyrshang ban kiar na ka jingshah peitngor ha ryngkat bad ka jingpyrshang ban jam sha shiliang pud, hynrei ki shipai BSF kiba la peitngor bha ki la ïoh bat noh ïa une u briew ba ki suba.
Ha ka jingtohkit ba nyngkong, une u briew u la pynpaw ba u dei u nong Bangladesh ba la tip kyrteng kum u Md. Ibrahim bad u shong u sah ha Sylhet district.
Ki la pyntip ba une u briew u dei ruh uba ju pynrung beaiñ ïa ki briew ban jam sha shiliang u pud u sam bad kiwei kiwei de ki jait kam ba long beaiñ.
Hadien ka jingtohkit, ki BSF ki la aiti noh ïa une u briew sha ki pulit ka thanat Dawki ban pynlong ïa ka jingtohkit kaba bniah pyrshah ïa u.
