Nongstoiñ, Ïaïong 07
Ha ka step jong ka 6 tarik mynta u bnai ha ka por kumba 7:30 mynstep, lai tylli ki ïing sah ha kawei na ki jaka rep ha ‘law Ksaw kaba hap hapoh ka shnong Nongkyllang-Mawpayier ba hap hapoh ka Rambrai Syiemship ki la shah thang dusmon.
Halor katei ka jingjia, ki trai jong kitei ki ïing ba la shah thang ba kynthup ïa ka Kong Andra Mawnai, Plor Mawnai, Ebannia Mawnai, Langier Mawnai bad ka Kong Blindaris Lyngdoh Mawdoh ha ka janmiet jong ka 7 tarik u Ïaïong 2025, ki la leit ban buh da ka jingujor hapoh ka thanat Nongstoiñ.
Na ka liang ki trai jong kitei ki ïing kiba la shah thang ha ka jingdon lang ka Kong Pyier Mawnai ki la pynpaw bad kam ba ha katei ka step ka kynhun kaba la ïalam da ar ngut ki rangbah ba kynthup ïa u Paul Leong bad u Bah Kimfa Marbaniang, MLA barim kiba dei ruh shi kpa shi khun ki la leit ha kitei ki ïing ha jaka rep kaba dei jong ka Kong Andra Mawnai, Noberstar Mawnai, Rajiv Mawnai, Plor Mawnai, Ebania Mawnai bad Langier Mawnai ha katei ka jaka ha kaba la kynnoh ba ki la byrngem byrsit bad ki la beh noh ïa ki na kitei ki ïing.
Nalor kane, ki la ong ruh ha katei ka por ha ka jingtieng ki la phet noh ban lait na ka jingïap bad baroh ha katei ka por ki don 6 ngut bad la kynnoh ruh ba u Paul Leong u la sei da ka pistol bad thew ïa ka khlieh ban siat pyntieng ar kuli sha suiñ ïa u Rajiv Mawnai bad ki la thang ruh ïa kitei ki ïing jong ki baroh lai tylli kiba don marjan bad ki la thang lut ruh ïa baroh ki tiar ki tar hynrei donbok bym shym la don kano-kano ka jingmynsaw.
Shuh shuh ki la ïathuh ruh ba ka jinglut jingsep baroh ha katei ka jingshah thang kam duna ïa ka shi lak tyngka.
Haba pyrshang ban kylli, kaei ka daw ïa kaba kitei ki briew ki la wan ban thang ïa kitei ki ïing bad beh ïa ki na katei ka jaka, wat la kam shym la shai bha ka jubab hynrei la suba ba ka lah ban dei na ki kam ïaknieh ïa ki jaka-puta.
