Shillong, Ïaïong 07
U Myntri Rangbah ka Jylla, Conrad K Sangma ha ka Lah Sngi U Blei u la pynbna ïa ka song pisa kaba T.15 klur ban kyrshan ïa ka Seng Khasi Kmie ba kan ïoh tei ïa ka Indigenous Cultural Cen -tre (ICC) ha Mawkhar.
Ïa kane, na ka liang jong u Conrad u la pynbna haba ïashim bynta ha ka sngi kut jong ka Shad Suk Mynsiem kaba la long ha Madan Weiking, Jaïaw.
Haba kren halor ka jingdonkam ka Indi-genous Cultural Centre, u Conrad u la ong, “Kumba ngi la ju pynpaw ngi donkam ban pynneh pynsah bad kyntiew ïa la ki kolshor, ki riti dustur, kumta ngi donkam ban don ïa ka Indigenous Cultural Centre jong ka Seng Khasi”.
Ha kaba ïadei bad kane, u Conrad u la ong ba na ka bynta ka ICC ha Mawkhar, ka Sorkar ka la mang T.15 klur bad ha u bnai Jymmang yn buh ïa u mawnongrim na ka bynta ban tei bad sdang ïa ka projek.
U la ong ba ka Indigenous Cultural Centre ha Mawkhar kan dei ka projek thymmai hynrei kin don ruh ki kam ban pynthymmai bad ïa kane ka projek yn tei da kaba pynshong nongrim bha ha ka teknoloji katkum ka juk mynta.
Ha kawei pat ka liang, u Conrad u la ong ba ha kaba ïadei bad ka Madan Weiking, ba la donkam ban pynbha ne pynthymmai ïa ka Madan namar kane ka madan ka don la ka jong ka jinglong kyrpang bad ïohi ruh ba ki nongjngoh kai pyrthei ki tuid bha ha kane ka madan namar kata la sngew ba donkam ban pynheh ïa ki jaka shong paidbah”.
Ha kaba ïadei bad kane, u Myntri Rangbah u la pyntip ba shen un sa ïakren bad ka Organizing Committee jong ka Seng Khasi Kmie ban ïasyllok na ka bynta ban ïatreilang khnang ban lah ban pynbha ïa ki jingtei ha Madan Weiking”.
Nalor kane u Myntri Rangbah u la ong, ka jingkyrshan ka Sorkar Jylla kam kut tang ïa ka Seng Khasi Kmie hynrei kan ïai bteng ban kyrshan ïa baroh ki jaidbynriew kiba don hapdeng ka jingthrang ban pynneh pynsah bad kyntiew ïa la ki kolshor bad riti dustur.
