New Delhi, Ïaïong 07 (UNI)
Ka Sorkar ha ka Lah Sngi U Blei ka la pyntikna ba kan ym don ka jingkiew dor ha ka ‘diesel’ bad ‘petrol’ namar ka jingkiew jong ka khajna (Excise Duty) da T.2 shi litar ha baroh ar tylli kine ki umphniang ba kongsan hynrei ka la pynbna ba ka dor jong ka LPG na bynta ki nongpyndonkam kan kiew da T.50 shi ‘cylinder’.
“Ka dor jong ka LPG kaba 14.2 kilo kan kiew na ka 500 sha ka 550 hapoh ka Ujwala bad na ka 803 sha ka 853 na ka bynta ki bym pyndonkam ïa ka Ujwala,” ong u Myntri ka tnad Umphniang ka Sorkar Pdeng, Hardeep Singh Puri.
Haba jubab ïa ka jingkylli halor ka jingktah jong ka jingpynkiew khajna halor ka umphniang ‘petrol’ bad ‘diesel’, u Puri u la ong ba ïa ki rai la shim da ka tnad pla tyngka ka Sorkar Pdeng bad kan ym leit sha ki nongpyndonkam.
“Kan leit sha ka song pisa ne ‘General Kitty’ bad yn pyndonkam na ka bynta ban siew kylliang ïa ka jingduhnong jong ki OMC (Oil Marketing Companies),” u la ong.
Ka tnad Petroleum & Natural Gas ka Sorkar Pdeng ha ka jingthoh ha ka rynsan lad pathai “X” ka la ong, “Ki kompeni die umphniang jong ka PSU ki la pyntip ba kan ym don kano-kano ka jingkiew ha ka dor die jong ka umphniang ‘petrol’ bad ‘diesel’, hadien ka jingpynkiew ïa ka khajna mynta ka sngi.”
La pynkiew ïa ka khajna ha kaba ïadei bad ka ‘Petrol’ sha ka T.13 shi litar bad ka ‘Diesel’ – T.10 shi litar, ong ka jingpynbna ba tikna ka tnad khajna, jong ka tnad pla tyngka ka Sorkar Pdeng, kaba la pynmih ha ka 7 tarik u Ïaïong, 2025.
Ka dor die (RSP) jong ka ‘petrol’ bad ‘diesel’ man la u snem ka la kiew bha ha kine ki 10 snem ba la dep.
Katkum ka jingtip ba tikna, ka RSP jong ka umphniang ‘petrol’ bad ‘diesel’ ha Delhi ha u snem 2024-25 (haduh ka 30 tarik u Kyllalyngkot, 2025) ka long T.94.73 bad T.87.63, kaba kham heh na ka 61.59 bad T.47.01 ha u snem 2015-16.
Ïa ka jinghiar dor ka umphniang ‘crude oil’ ha ka pyrthei dang shen, lah ban pynshong nongrim ha ka thma khajna ha ka liang ka ïoh ka kot kaba dang ïaid bad ka jingpynbor kaba nang kiew ha ki katto-katne ki ri kiba heh ha ka ïoh ka kot.
Ka Congress, kaba dei ruh ka Liang Pyrshah ka la ther tyngeh ïa ka Sorkar da kaba ong ba ka dor jong ka umphniang ‘crude oil’ ka la hiar sha ka kyrdan kaba rit tam ha kine ki saw snem hynrei ki nongpyndonkam ki la shah pynduh ïa kano-kano ka jingmyntoi.
“Ka dor jong ka umphniang ‘crude oil’ ka la hiar sha ka kyrdan kaba rit tam ha kine ki saw snem ba la dep. Katkum kane, ka dor jong ka ‘petrol’ bad ‘diesel’ ka la dei ban hiar ym duna ïa ka T.20. Hynrei ka Sorkar jong ngi ka la pynkiew dor da T.2 mynta ka sngi,” la ong u nongaiktien ka Congress, Pawan Khera.
