Shillong, Ïaïong 08
Ka Sorkar Jylla ka la bthah ïa ka Search Committee ba la thung ban wad Chairperson bad dkhot ba thymmai ka Meghalaya Lokayukta, ba kin aiti noh ïa ki kyrteng hapoh ka 30-45 sngi.
Haba kren bad ki lad pathai khubor ha ka Sngi Ba-ar, u Myntri Rangbah ka Jylla, Conrad K Sangma u la pyntip ba ka Sorkar ka la bthah ïa ka Search Committee ba la khlieh da u ophisar IAS ba la shongthait, Bah Peter Dkhar ba kan pyndep noh kham kloi ïa kane ka kam.
U la ong ba u khmih lynti ba ka Search Committee kan aiti noh ïa ki kyrteng hapoh ka 30-45 sngi. Bad shisien ba la dep ïa kane yn sa shong biang ha ka Selection Committee kaba khlieh da u Myntri Rangbah ba ïadonlang u Lamphang ka ïingdorbar thaw aiñ, u Symbud Myntri Rangbah, Nongïalam ka Liang Pyrshah bad u Chief Justice ka Meghalaya.
Ka Meghalaya Lokayukta ka khlem lah treikam shuh mynta la palat shibnai hadien ba la kut ka samoi treikam jong u Bah Bhalang Dhar, IAS (retd.) kum u Chairperson ha ka 28 tarik Rymphang mynta u snem, bad namar kane ka jingbym don shuh u Chairperson, ka Lokayukta kam lah shuh ban pdiang ïa ki jingujor namar ka treikam beit tang da u Chairperson khlem don da kiwei pat ki dkhot.
Ha kajuh ka por u Myntri Rangbah u la pyntip ba ka Kynhun Myntri ka la mynjur ruh ïa ka jingpynkylla (Amendment) jong ka Rules na ka bynta ka Search Committee da kaba pynbun ïa ka jingsiew bai shong jingïalang jong u Chairman bad ki Dkhot.
U la ïathuh ba mynshwa ki dkhot ka Committee ki ju ïoh T.2500 shisien shong jingïalang bad la sngew ba dei ban pynkiew noh ïa ka namar tang kawei lane ar tylli eh ki jingïalang ki don, bad ïa ka pisa la pynkiew sha ka T.5000 ïa ki dkhot bad Chairman na ka T.3000 sha ka T.6000.
