Shillong, Ïaïong 08
Ki nong Bangladesh na kawei ka sngi sha kawei pat ki dang ïai bteng ban jam shapoh u pud u sam jong ka India bad la sakhi ïa kane da ka jingshah kem bad shah bat na kawei ka sngi sha kawei pat. Ha ka 7 tarik mynta u bnai ruh, ki shipai ïada khappud Border Security Force (BSF) ki la ïoh ban kem ïa ki 3 ngut nong Bangladesh kiba thmu ban jam shapoh u pud u sam ka Jylla Meghalaya.
Hadien ba la ïoh jingtip ba thikna, ki shipai BSF jong ka 172 Bn ki la pynlong ka jingap ktem ha ki thaiñ East Jaiñtia Hills bad ki la ïoh bat ïa kitei lai ngut ki nong Bangladesh katba ki dang thmu ban jam sha shiliang u pud.
Ha ka jingtohkit, kitei lai ngut kiba la shah kem ki la phla ba ki dei ki nongshong shnong na ka thaiñ Sylhet District Bangladesh. Ïa baroh lai ngut kiba shah kem la aiti noh sha ki pulit ka Umkiang Post Outpost ha East Jaiñtia Hills ban leh ïa kaba donkam katkum ki kyndon aiñ.
Ka kyrwoh na ki BSF ka la kren shai ba ki shipai ki ïeng ha ka nongrim kaba skhem ban ïada ïa la u pud u sam bad kin ym ailad satia ïa ki kam beaiñ ha ki thaiñ khappud khamtam haba ïadei bad ka jingwan rung tuh ki briew napoh ka Ri Bangladesh.
