Shillong, Ïaïong 08
Ka Hynñiewtrep National Youth Front (HNYF) South East Sohra Circle ha ka 8 tarik Ïaïong, 2025, ka la leit ban buh da ka dorkhas ha u Chief Executive Member (CEM) ka Khasi Hills Autonomous District Council (KHADC), Bah Shemborlang Rynjah na ka bynta ban pynsngew ïa ki jingeh kaba ki katto-katne ki shnong bad ki hima kiba don ha khappud bad ka Ri Bangladesh ki ïakynduh na ka por sha ka por.
Haba kren sha ki lad pathai khubor, u Bah Banjop Khongwir uba dei u nongaiktien ka HNYF South East Sohra Circle, u la ong ba ka jingwan buh ka seng da ka jingthoh ha u CEM ka long ban pynsngew halor ka jingïoh rung kyrthep ki bar jylla hapoh ka shnong Majai khlem da don ka jingtip na ki bor shnong ne bor hima.
“Ka jingrung kyrthep ki mynder ri ban buhai shnong hapoh ka shnong Majai khlem da don ka jingtip na ki bor shnong ne bor hima bad ka jingbym don ka khana samari ïa kine ki bar jylla ne bar ri, na ka liang ka hima bad ka ophis u Syiem ka wanrah shibun ki jingma ïa ki trai ri trai muluk hapoh kane ka shnong”, ong u Bah Banjop.
U Bah Banjop u la ong, ba Ia ïohi kumba ka Land Transfer Act kam shym la treikam bha namar ka jingnang ïohbor ki bar jylla ban thied jaka khamtam eh ba ka la don ka jingïathied jaka sop-sop khlem ka jingïoh jingbit na u Sordar ne wat na ka shnong.
U Bah Banjop u la ong ba ka jingai pathar ïa ki jaka-puta hapoh ka shnong Majai na liang ka ophis u Syiem Sohra ka pynshlur ïa ki bar jylla bad ai mynsiem ïa kiwei de ki mynder ri ban wan buhai shnong khlem don jingsalia shuh ïa ki trai trai muluk kiba don hapoh kane ka jaka da kaba kyntu ruh ïa ka District Council ba kan pynkylla kyrteng noh ïa ki katto-katne tylli ki shnong kiba don hapoh ka Hima Sohra kiba hap hapoh ka thaiñ Majai na ka ktien nongwei sha ka ktien Khasi kiba kynthup ïa ka Kurikhal, Nayabasti, Chaklabasti, Dhorombasti bad Alubari.
Ka seng ka la pynsngew ruh halor ka jingthung Rangbah Shnong da ki mynder ri hapoh ka shnong Nayabasti, Chaklabasti, Dhorombasti.
“Ngi kum ka seng ngi pyrshah jur ïa ka jingthung Matapbor ne rangbah shnong hapoh kine ki shnong da ki mynder ri kum ha Nayabasti, Chakalabasti bad Dhorombasti”, ong u Bah Banjop.
Shuh-shuh, ka Seng ka la pynsngew ruh halor ka jingslem ban pynkylla kyrteng ïa ki shnong kiba don ha khappud kiba la dep rai ha u snem 2020 kiba u Sordar u khlem pat leh eiei haduh mynta.
“Ha kaba ïadei bad ka Hima Mawlong hadien ka jingkhlad noh u samla Lurshai Hynñiewta, ka Dorbar Hima ba la pynlong ha u bnai Lber 2020 ka la shim ïa ka rai ban pynkylla kyrteng ïa ki shnong ba don sha khappud sha ki kyrteng ba la buh da u longshwa-manshwa ha ka hima kum ka Ic?unati, Rangamati, Dhorom, Tallab, Khuti, Lubia, Kalibari bad Beltoli hynrei u Sordar Mawlong u dang shong klikti haduh kine ki sngi la 5 snem mynta”, ong u Bah Banjop.
Kumjuh, ka seng ka la pynsngew halor ka jingmih ka ïew beaiñ ba la pynlong da ki bar jylla da kaba kyrpad ïa ka District Council ba ka dei ban khang noh mardor ïa kane ka ïew.
