Shillong, Ïaïong 08
Ïa ka ‘World No Tobacco Day’ (WNTD) la rakhe ha kylleng ka pyrthei ha ka 31 tarik u Jymmang man u snem, bad mynta u snem, la sdang ïa ka jingïalap WNTD’25 da ka phang kaba khlaiñ bor – ‘Tobacco! Business of Death’ aligned with this year’s theme – ‘Unmasking the Appeal: Exposing Industry Tactics on Tobacco and Nicotine Products’.
Ha kine lai snem ba la dep, palat 8,000 tylli ki skul bad 5 lak ngut ki khynnah ki la ïashim bynta shitrhem ha ka WNTD, da kaba pynlong ïa ki jingïaid paidbah, bad ki jingïasoi kyrteng ban pynsngewthuh paidbah shaphang ka jingma jong u duma.
Ha u snem 2025, ïa kane ka jingïalap yn pynlong ha kylleng ki skul bad ki kolej ha u bnai Ïaïong bad Jymmang, 2025.
Haba ai jingkren ha ka jingpyllait paidbah ha ka Jylla, ka Dr. Nabaneeta D. Mawrie, State Nodal Officer ka National Tobacco Control Programme, ka tnad ka Koit ka Khiah ka la ong, “Ha ryngkat jan shiteng na kiba la heh kiba ha ka rta 15 snem bad shaneng ha ka Jylla ki pyndonkam ïa u duma – ka Jylla ka duh kumba 8,000 ngut ki briew man u snem na ki jingpang ba ïadei bad u duma.”
Ka jingïalap jong ka WNTD’25, kaba la sdang ha ka 7 tarik u Ïaïong, 2025, ka khot ka wer ïa ki jaka pule ban shim ïa ki rai lyngba ar tylli ki sienjam ba kongsan – ki jingïaid paidbah bad ki jingïasoi kyrteng.
Kane ka dei ka jingpynjlan ïa ka ‘Tobacco-Free Educational Institutions’ (ToFEI) kaba la sdang ha u Lber, 2021 ha ki skul bad ba la pynïar sha ki kolej ha u Nailur, 2023 ha ryngkat ka jingïatreilang bad ka Sambandh Health Foundation.
Mynta u snem, ka thong ka long ban pynïatylli ym tang ïa ki khynnah skul bad ki nonghikai, hynrei ïa ka imlang-sahlang baroh kawei ha kane ka kam.
Na ka liang ka tnad pule-puthi, ka Jennyfer J. Synrem ka la ong, “Ha u snem ba la dep, palat 7,000 tylli ki skul ha ka Jylla ki la ïalum lang na ka bynta ka WNTD’24, da kaba lum ïa ki jingsoi kyrteng kiba la kot haduh 43 lak tylli.
Ha kajuh ka por, ka la ong ba palat 5 lak ngut ki khynnah pule ki la pynpaw ïa ka jingïeng pyrshah ïa u duma.
“Na ka bynta ka WNTD’25, ngi khot ïa ki skul ba kin ïalam biang na khmat sa shisien. Ryngkat lang, to ngin tei ïa ka Meghalaya kaba lait na u duma. To ngin ïada ïa ki khun ki kti, ki longïing-longsem, bad ka lawei baitynnad jong ka Jylla jong ngi,” ka la ong.
Shuh shuh haba kren halor ki lad jingpyrshang na ka kyrdan jong ka distrik, u Deputy Commissioner ka EJH, Shivansh Awasthi, IAS, u la bynrap, “To ngin ïasnohktilang ban pynsngewthuh lyngba ki jingthmu kum ka WNTD, bad ïatreilang na ka bynta ka lashai kaba koit ba khiah da kaba pdiang lang ïa ka jingkylla ha ka jinglong-jingman.”
