Shillong, Ïaïong 08
U Myntri Rangbah ka Jylla, Conrad K Sangma u la ong ba ka Sorkar Jylla ka kwah ban tuklar halor ka jingmih ka kynrum-kynram hapoh ka skulbah North Eastern Hill University (NEHU), hynrei ka lynti ka aiñ kam shah satia.
Haba kren ha ka Sngi Ba-ar, u Conrad u la ong ba wat la ka lynti kam shah, hynrei ka Sorkar sngew khia jur ïa ka jingmih ki kynrum-kynram khamtam kaba ktah ïa ki samla pule, bad pynpaw ba na ka liang ka Sorkar Jylla ka la pyrshang ban pynbeit ïa kane ka jingeh katkum ka bor ba ka don, da kaba ïakren bad ka Sorkar Pdeng ban pynbeit noh mardor ïa ki kynrum-kynram ban pynthikna ka jingtreikam ba ïaid beit hapoh ka skulbah.
“Nga ïakren bad ka Sorkar India, bad u Myntri ka Ministry of Education man ka por bad pyntip sha u ïa kaei kaba jia bad kyrpad ruh ban wad ïa ki lad ki lynti ban pynbeit noh ïa ka. Ki la pyrshang kat kaba lah ban leh eiei bad nga la kyrpad biang ïa baroh wat la ki lah ban don ki jingeh hangne-hangtai, ngi donkam ban ïatreilang ban pynbeit ïa kane na ka bynta ka jingbha ki samla pule”, la ong u Conrad. Halor ka jingïai bteng ban ïakhih pyrshah ïa u Vice Chancellor ka University, u Myntri Rangbah u la pynpaw ka jingsngewkhia ïa kaei kaba la jia ha NEHU.
“Nga khuslai ïa ki samla pule bad ki don ki jingeh na baroh arliang. Ngi la pyrshang ban sngewthuh ïa kine ki jingeh, ngi pyrshang ban ïakren ïa ki kynhun bapher-bapher, la ka dei ma nga lane ki briew kiba don ha ka Sorkar bad ngi pyrshang ban peit kumno ngin lah ban pynbeit ïa kane ka kam khnang ba ka NEHU kan lah ban treikam khlem ki jingthut”, u la ong.
U Myntri Rangbah u la ong ba ka NEHU ka dei ka tnad treikam ba laitluid bad kaba treikam hapoh ka jingkhmih ka Education Ministry jong ka Sorkar Pdeng, bad ka Sorkar Jylla ka shem jingeh ban tuklar bad hap ban ïaid da ka lynti.
“Ngi sngewkhia bha, wat la ngim lah tuklar dalade ïa kane ka kam, hynrei ngi la ïakren”, la ong u Myntri Rangbah.
