Shillong, Ïaïong 08
Ka Sorkar Jylla ka la pyntip ba ka ‘EasyLottery’ lane ka khalai nusib da ka kor ‘digital’ ba nyngkong eh ha India kaba la sdang da ka Sorkar Meghalaya ha u snem 2024, ka la ïakynduh mawsiang na ki jingshah tynjuh ha ka aiñ.
U Myntri Rangbah ka Jylla Conrad K Sangma, uba la pyllait paidbah ïa kane ka lottery ha New Delhi, u la kubur ïa kaei kaba jia, hynrei u la pynpaw ba um pat shong bishar bniah ïa ka rukom treikam, bad bynrap ba u kyrmen ba ka kam kan sa ïaid beit noh shen.
“Ngi la sngew skhem bha ïa ka namar ka jingstad teknoloji ba la pyndonkam. Ka jinglong kaba shai kaba ka la pynthikna bad pynlong ïa ngi ban ngeit ba kane ka lah ban long ka lawei jong ki ‘lottery’ ha India”, u la ong.
U la ong ba ki jingeh ba bun kiba mih, bad kane ka khalai nusib kam shym la treikam kumba la thmu da ka Sorkar.
Haba batai ïa ka jingthmu jong ka jylla ha lyndet jong kane ka rukom khalai, u Conrad u la ong ba ka jingwan rung jong ka teknoloji la ïohi kum ka lad kaba thymmai ban pynthymmai ïa ka rukom treikam, hynrei kumba la khmih lynti, ki jingeh ha ka liang ka aiñ ruh ki la mih.
U Conrad u la pynshai ba ki jingïakynad ha ka liang ka aiñ ki ïatyngkhuh nyngkong eh bad ki nongpynïaid ïa ka khalai nusib ym tang ha Meghalaya hynrei ha ki Jylla bapher-bapher.
“Ki don ki mukotduma kiba dang ïaid shakhmat, katto-katne ki dang don ha ka jingïakhun. Ngi kyrmen ban lah pynbeit shen”, u la ong.
U Conrad u la ong ba ka thong jong ka Sorkar ka long ban tei ïa ka jingshaniah ha ka rukom treikam bad kumjuh ban pynmih kham bun ka khajna na ka bynta ka Jylla.
“Ka dei ka karkhana kaba heh bha, ha kaba ki Jylla bapher-bapher ki don la ki jong ki aiñ bad ki kyndon. Dei na kata ka daw ba kane ka jingthmu ka la ïakynduh ïa ki jingeh ha ka liang ka aiñ. Ngin hap ban ap bad peit, hynrei nga kyrmen ba ïa kane ka kam yn sa pynbeit noh kloi”, la ong u Myntri Rangbah.
