Shillong, Ïaïong 08
Ka tnat India Meteoro-logical Department (IMD) Shillong, ha ka Sngi Ba-ar, ka la pynmih ïa ka Yellow Alert ïa baroh ki district ka jylla Meghalaya ba ka lah ban don ka jingpom pyrthat bad ka ‘leilieh ryngkat u slap ba jur ha ki katto katne ki jaka naduh ka 8 tarik u Risaw haduh ka 12 tarik Ïaïong.
Ka jingmaham na ka IMD ka ong ba baroh 12 tylli ki district ba kynthup ïa ka East Khasi Hills, West Garo Hills bad kiwei ki lah ban mad ïa ka jinglong ka suiñ bneng ka bym shngaiñ ha baroh shi taïew.
Wat la ka jingmaham na ka IMD ka kynthup ïa ka Jylla baroh kawei hynrei la pynleit jingmut kyrpang ïa ka East Khasi Hills bad West Garo Hills ha kaba la antad ba kine ar tylli ki district ki lah ban mad ïa ka jingpom pyrthat kaba jur ryngkat bad ka jinghap jong u ‘lapbah ba jur.
Ka IMD ka la kdew ruh ba ka jingjur jong u slap ka lah ban long naduh 64.5 mm haduh palat 115.5 mm ha ki katto katne ki jaka, khamtam ha ka 9 bad 10 tarik Ïaïong.
La kyntu ïa ki nongshong shnong kiba don ha ki jaka kiba don jingma khamtam ha East Khasi Hills kaba kynthup ïa ka nongbah Shillong bad West Garo Hills ba kin long kiba husiar bha.
La kyntu ïa ki bor synshar shnong ba ki lah ban shim ïa ki lad jingïada ban pynthikna ïa ka jingshngaiñ jong ki paidbah.
