Shillong, Ïaïong 08
Ka Kynhun Myntri ka la mynjur ïa ka Meghalaya Witness Protection Scheme, 2025 ban ai jingïada ïa ki nongai sakhi ha ki jingjia bapher-bapher hapoh ka Jylla.
Haba pyntip ïa kane hadien ka jingïalang, u Myntri Rangbah ka Jylla, Conrad K Sangma u la ong ba ki don 3 tylli ki aiñ ba thymmai jong ka Bharatiya Nagrik Suraksha Sanhita (BNSS) kiba la pyntreikam da ka Sorkar Pdeng bad ki Sorkar Jylla bad ha katei ka aiñ kaba thymmai ka la don ka kyndon ban ai jingïada ïa ki nongai sakhi lyngba ka skhim ïa kaba ka Sorkar Meghalaya ka la ai jingmynjur mynta.
“Hadien ba la pynshong nongrim ngi la mynjur ïa ka Meghalaya Witness Protection Scheme, 2025 da ka jingthmu ban ai ka jingïada kaba kongsan ïa ki nongai sakhi halor ki jingjia bapher-bapher”, la ong u Conrad ha ka Sngi Ba-ar.
Haba batai halor kane ka skhim, u Myntri Rangbah u la ong ba ha man la ki district kin don ki committee ban khlieh da ki district magistrate bad kin don ruh ki dkhot na ki bor Sorkar bad kine ki committee kin sa shim ïa ka rai katkum ka jinglong jingman jong ka jingshah byrngem-byrsit bad ïa ka jingdonkam ban ai ïa ka jingïada ïa ki nongai sakhi, kaba lah ban long da kaba ai da ki nongpahara khnang ba kin lah ban ai ïa ka sakhi ka jong ki ne ban ai ïa ka jingphla lyngba ka camera.
“Ki don bun ki kyndon ban ai jingïada bad ka dei kaba la kdew ha ki Rules, hynrei ka jingmut hi ka long ba kitei ki kyndon ki dei kiba la don ha ka aiñ kaba thymmai bad man la ki Jylla ki hap ban wanrah ïa ki skhim bapher-bapher”, u la ong.
Ha kawei ka liang u Myntri Rangbah u la pyntip ba ka Kynhun Myntri ka la mynjur ïa ka jingpynkylla (Amendment) jong ka Meghalaya State Language Act, 2005 ban lah pyntreikam ïa ka associate official language (Khasi) ha Eastern West Khasi Hills District.
U Conrad u la ong ba katkum ka Meghalaya State Language, 2005, ki associate language ha ki district bapher-bapher ka Jylla ki la don lut bad ki shah ban ïakren da ki ktien lajong bad shah ruh ban thoh ha ki eksam bad ïa ka jingpynkylla la wanrah hadien ba la pynkha district thymmai ïa ka Eastern West Khasi Hills.
