Shillong, Ïaïong 08
U President ka Khasi Students’ Union West Jaiñtia Hills District Bah Laitphar Syngkrem, u la ong ba baroh ki shnong Khasi kiba don ha khappud ki dei ban hap beit ha Meghalaya ha ka jingïapynbeit pud bad ka jylla Assam.
U Bah Laitphar u la ong ba kito ki shnong Khasi kiba don bad hap hapoh ka Block-1, kiba don ka jingïakajia pud ki dei ban hap beit sha Meghalaya.
U la ïathuh ruh ba ka jingdawa ka seng ka long hakhmat ki nongïalam ka regional committee ha ka por ba ki leit jurip ïa ki shnong ha khappud.
Shuh shuh u la pyntip ba ka KSU West Jaiñtia Hills district ka la ïatreilang bad ki nongkitkam shnong ba kin pynbiang ïa ki kot ki sla ban pynshisha ba ki hap hapoh ka Meghalaya.
U la ïathuh biang ba kito ki shnong Khasi kiba la hap lypa sha Assam, ka seng kam ong eiei shuh. U la ban jur ba kito ki shnong kiba hap ha ka jingïakajia pud ki dei ban hap beit sha Meghalaya.
Ha kajuh ka por u la ïathuh ba ïa kane ka jingïapynbeit pud, ka Sorkar Jylla bad Sorkar Assam la shimti beit da ki nongïalam ka KSU Sengkmie ba kan ïakren bad ka Sorkar Jylla.
Kum ban shu pynkynmaw ba ka Sorkar Jylla ka la thaw ïa ka Regional Committee West Jaiñtia Hills district ha kaba la khlieh hi da u MLA ka NPP ka Nartiang Bah Sniawbhalang Dhar uba long kum Symbud Myntri Rangbah ka jylla.
