Shillong, Ïaïong 08
U Myntri Rangbah ka Jylla, Conrad K. Sangma ha ka Sngi Ba-ar u la ong sa 11 ngut ki nongtih dewïong ki dang ap ban ïoh ïa ka jingmynjur ban sdang ïa ka jingtih dewïong katkum ka juk stad saïan ha ka Jylla hadien ba 3 ngut kiwei pat ki la dep ban sdang ïa ka jingtih dewïong katkum ka aiñ.
U Sangma, uba peit ruh ïa ka tnad Mining & Geology, u la ong ba kine 11 ngut, kiba bun na East Jaiñtia Hills bad West Khasi Hills, kin sa ïoh ïa ka jingbit (jong ki) ban tih dewïong, ha kine ki khyndiat bnai ban wan.
Haba pyntip ba 3 ngut ki nongtih dewïong ki la dep ban sdang ïa ka kam tih dewïong katkum ka juk stad ka saïan ha East Jaiñtia Hills, u Myntri Rangbah ha kawei ka liang, u la ong ba ki don katto-katne ki mat kiba donkam ban pynbeit ha kaba ïadei bad ka jingshalan ïa u dewïong ba la tih katkum ka aiñ.
U Sangma u la ong ba ka Coal Ministry ka la sakhi ïa ka kam ba ïadei bad ka jingtih bad ka la sngewhun ba la leh ïa ka katkum ka juk stad saïan, bad ki kam ki dang ïaid shakhmat ban ai jingmynjur ïa kiwei pat ban sdang ïa ka jingtrei ha kajuh ka rukom.
Ha ka 17 tarik Lber, ka Jylla ha ka sien banyngkong ka la sdang ban tih dewïong katkum ka juk stad saïan hadien ba ka National Green Tribunal (NGT) ka la khang ïa ka jingtih dewïong ‘liew khnai hapoh ka Jylla.
Ki jaka tih dewïong katkum ka juk stad saïan ba nyngkong eh ha ka Jylla – Saryngkham-A Coal Mine, Byndihati ha East Jaiñtia Hills. Ïa kane ka jaka tih dewïong la ai wai sha uwei u nongtih dewïong, Bah Dapmaiñ Shylla na Byndihati bad ka jingtih dewïong kan ïaid katkum ka juk stad saïan.
Kum ban shu kdew hangne, dei ha u bnai Kyllalyngkot, 2025 ba ka Sorkar Jylla ka la ïoh ïa ka jingbit ba khatduh ban tih dewïong katkum ka juk stad saïan hadien ba 3 ngut ki nongtih dewïong ki la soi ïa ki jingïateh ‘Escrow’ bad u Controller of Coal, ka Sorkar India.
